પ્રતિભાવો ઉર્ફે Comments

Saturday, August 16, 2014

સોળમી લોકસભા : સંસદમાં ગુજરાતની સ્ત્રીશક્તિ

ભારતની સંસદ / Parliament of India

સોળમી લોકસભાની રચના માટે જરૂરી સામાન્ય ચૂંટણીઓની જાહેરાતથી લઈને મતગણતરી સુધીના પંચોતેર દિવસની ચૂંટણીપંચ – રાજકીય પક્ષોની જાહેર અને અસંતુષ્ટોની ખાનગી તપશ્ચર્યાનો પરિણામો સાથે અંત આવ્યો. ગુજરાતની તમામ છવ્વીસ લોકસભા બેઠકના પરિણામ ભાજપની તરફેણમાં આવ્યા પછી પૂર્વે ચૂંટણીના ઉમેદવાર અને હવે સંસદના સેન્ટ્રલ હોલમાં સાથી સભ્યો પાસેથી ‘માનનીય સંસદસદસ્ય મહોદયા’નું સંબોધન પામતા ગુજરાતના ચાર મહિલા સંસદસભ્યોનો પરિચય કેળવીએ.

2004માં ચૌદમી લોકસભાની રચના થઈ ત્યારથી ‘મહિલા અનામત બિલ’ નામનો ચર્ચાતો મુદ્દો આપણે સાંભળતા આવ્યા છીએ. પંચાયતથી લઈને સંસદ સુધીની લોકપ્રતિનિધિત્વ બક્ષતી બંધારણીય સંસ્થાઓમાં મહિલાઓને તેત્રીસ ટકા અનામત બેઠકોની જોગવાઈ આ બિલમાં છે. તમામ રાજકીય પક્ષોની સહમતી છતાં આ બિલ સમાજવાદી પક્ષ અને તેના મુખિયા મુલાયમ સિંહ યાદવના / Mulayam Singh Yadav વિરોધ વચ્ચે કાયદામાં પરિવર્તિત થઈ શક્યું નથી.

સંસદના ફ્લોર પર પસાર નહીં થઈ શકેલા આ ‘મહિલા અનામત બિલ’ની આસપાસ જ જો ગુજરાતની ચૂંટણીની ચર્ચા કરીએ તો વસતી અને વિસ્તાર પ્રમાણે ગુજરાતના ફાળે આવતી લોકસભાની છવ્વીસ બેઠકો માટે ભારતીય રાષ્ટ્રીય કૉંગ્રેસ / Indian National Congress / http://www.inc.in/ અને ભારતીય જનતા પક્ષ / Bharatiya Janata Party / http://www.bjp.org/ એવા બે મુખ્ય રાજકીય પક્ષોએ એકસરખી સંખ્યામાં ઉમેદવારો ઊભા રાખ્યા હતા. ભારતીય જનતા પક્ષએ ચાર મહિલાઓને ટિકિટ આપી હતી અને કૉંગ્રેસ પક્ષએ ગત લોકસભાના તેના એકમાત્ર સિટીંગ એમ.પી. ડૉ. પ્રભાબહેન તાવિયાડને ટિકિટ આપી હતી. લોકસભા ચૂંટણીના મેદાનમાં પ્રથમવાર ઉતરનાર ‘આમ આદમી પાર્ટી’એ / Aam Aadmi Party / http://www.aamaadmiparty.org/ મહેસાણાની બેઠક માટે ભાજપી કુળના વંદનાબહેન પટેલની પસંદગી કરી હતી એ નોંધવું રહ્યું.

દર્શના જરદોસ
(સંસદસભ્ય, સુરત)
માત્ર ગુજરાતના નહીં પણ સમગ્ર ભારતમાં સૌથી વધુ મતોના તફાવતથી બેઠક જીતનારા મહિલા સંસદસભ્યનું નામ છે શ્રીમતી દર્શના વિક્રમભાઈ જરદોશ. પંદરમી લોકસભાની ચૂંટણી સુરત બેઠક પરથી પહેલીવાર માત્ર 75,000ના માર્જિનથી જીતી જનાર દર્શનાબહેન આ વખતના મોદીવેવમાં કૉંગ્રેસના નૈષધ દેસાઈ સામે 5,33,000થી વધુ મતોના માર્જિનથી ચૂંટણી જીતી ગયા. રૂપિયા બે કરોડની મિલકત ધરાવનાર તેઓ બી.કૉમ થયેલા છે. પહેલીવાર સંસદમાં ચૂંટાયા ત્યારે સુરત મહાનગર પાલિકાના કોર્પોરેટર રહી ચૂકેલા દર્શનાબહેન મતદારો – નાગરિકો સાથેનો લોકસંપર્કનું મહત્વ સમજે છે એટલે સંસદની બેઠક સિવાય સુરતમાં હોય ત્યારે સ્થાનિક કોર્પોરેટર, ધારાસભ્યોને સાથે રાખી લોકસંપર્ક જાળવી રાખવા માટે જાણીતા બન્યા છે. પક્ષના કાર્યકરો સાથે ટીફીન બેઠકો કરતા ત્રેપન વર્ષના દર્શનાબહેન પાણી, લાઇટ કે ગટરની સમસ્યા ઉકેલવા માટે એકસરખા ઉત્સાહી રહે છે. આ બેઠક પરથી ચૂંટાયેલા તેઓ પ્રથમ મહિલા સંસદસભ્ય છે. સુરત બેઠક ચાર વાર જીતી જનાર મોરારજી દેસાઈ 1977માં છઠ્ઠી લોકસભા ચૂંટણીમાં અહીંથી જીતીને વડાપ્રધાન થયા હતા એ એટલા માટે યાદ કરવું પડે કેમ કે આ વખતે 2014માં એ લહાવો વડોદરાને મળ્યો છે.

જયશ્રી પટેલ
(સંસદસભ્ય, મહેસાણા)
દર્શનાબહેનની જેમ જ બીજી વખત લોકસભા ચૂંટણી જીતી જનાર ઉમેદવારનું નામ છે જયશ્રીબહેન કનુભાઈ પટેલ. પંદરમી લોકસભાની ચૂંટણી મહેસાણા બેઠક પરથી પહેલીવાર માત્ર 22,000ના માર્જિનથી જીતનાર જયશ્રીબહેન આ વખતે ભાજપ તરફી એકમાર્ગી પવનમાં કૉંગ્રેસના જીવાભાઈ પટેલ સામે 2,09,000થી વધુ મતોના માર્જિનથી ચૂંટણી જીતી ગયા. જો કે લોકસંપર્કની બાબતમાં તે દર્શનાબહેનથી સામેના છેડે બેસે છે. સરપંચથી લઇને ગુજરાત સરકારનો સચિવ જાતે આમંત્રણ આપવા જાય તો ય સરકારના કાર્યક્રમોમાં હાજરી નહીં આપનાર પંચાવન વર્ષના જયશ્રીબહેન ભાજપમાં આનંદીબહેન પટેલની આંગળી પકડીને ચાલે છે એટલે બધું જ ચાલી જાય છે. સવા કરોડની સંપત્તિ ધરાવનાર અને મુંબઈથી ઓલ્ડ એસ.એસ.સી પાસ કરનાર તેઓ આ વખતે ટિકિટ મળ્યા પછી પક્ષનો અને ઊંઝાના પાટીદાર સમાજનો વિરોધ ખાળીને પણ જીતી શક્યા તેને મોટી ઉપલબ્ધિ માનવામાં આવે છે. અમદાવાદથી ઉપડતી કે મહેસાણાથી પસાર થતી દરેક ટ્રેનને મહેસાણાનું સ્ટોપેજ મળે તેમજ જિલ્લાના ખેડૂતોને રૉયલ્ટી આપવામાં અખાડા કરતી ઓ.એન.જી.સી સમયસર વળતર ચુકવે તે માટે સંસદમાં બોલવા માટે જાણીતા જયશ્રીબહેનને હવે નિરાંત થશે. કેમ કે હવે તેઓ સત્તાધારી પક્ષના સંસદસભ્ય બન્યા છે. સરદાર વલ્લભભાઈ પટેલના પુત્રી મણિબહેન પટેલ 1977માં છઠ્ઠી લોકસભામાં જનતા પાર્ટીની ટિકિટ પર ચુંટાઈને મહેસાણાની આ બેઠક પરના પ્રથમ મહિલા સંસદસભ્ય બન્યા હતા.


ડૉ. ભારતી શ્યાળ
(સંસદસભ્ય, ભાવનગર)
સોળમી લોકસભામાં ગુજરાતમાંથી બે વર્તમાન મહિલા સંસદસભ્યો ચૂંટાયા છે તો બાકીના ચૂંટાયેલા બે મહિલા સભ્યો તેરમી ગુજરાત વિધાનસભામાં ભાજપ તરફથી ધારાસભ્ય પદે બિરાજતા હતા. તેમાંના એક તળાજા (ભાવનગર જિલ્લા)ના ધારાસભ્ય ડૉ. ભારતીબહેન ધીરુભાઈ શ્યાળ 2,95,000 મતોના માર્જિનથી પહેલી જ ચૂંટણી ભાવનગર લોકસભા બેઠક પરથી કૉંગ્રેસના ઉમેદવાર પ્રવીણ રાઠોડ સામે જીતી ગયા છે. રૂપિયા એક કરોડના આસામી અને વ્યવસાયે આયુર્વેદિક ડૉક્ટર તરીકે ખાનગી પ્રેક્ટિસ કરતા તેઓ વિધાનસભા અને સંસદમાં બેસતા પહેલા જિલ્લા પંચાયતના સભ્ય રૂપે રહેવાનો તેમજ પ્રમુખપદે કામ કરવાનો અનુભવ ધરાવે છે. પહેલી જ વાર વિધાનસભા જીતનાર તેઓ આ બેઠક પરથી ચૂંટાયેલા પ્રથમ મહિલા સંસદસભ્ય છે. ચૂંટણીપ્રચાર ચાલતો હતો તે દરમિયાન ઉંમરની રીતે માર્ચ મહિનામાં વનપ્રવેશ કરનારા ડૉ. ભારતીબહેને 2014ના આ જ વર્ષમાં રાજકીય રીતે સંસદપ્રવેશ કર્યો છે એમ પણ કહી શકાય.


પૂનમ માડમ
(સંસદસભ્ય, જામનગર)
લોકસભા ચૂંટણી જીતી જનાર ભાજપના બીજા ધારાસભ્ય પૂનમ માડમએ ગુજરાત વિધાનસભામાં ખંભાળીયા બેઠકનું પ્રતિનિધિત્વ પહેલી જ વારની ચૂંટણી જીતીને કર્યા પછી જામનગર લોકસભા બેઠક 1,75,000 મતોના તફાવતથી જીતીને સીધો દિલ્હી ભણી બીજી વારનો કુદકો માર્યો છે. પહેલી વારનો કુદકો ભારતીય નૌકાદળમાં કામ કરતા નેવી ઓફિસર પરમિન્દર મહાજન સાથે લગ્ન કરીને દિલ્હીમાં ગૃહસ્થી માંડવા માર્યો હતો. છેલ્લી બે ચૂંટણીથી જીતતા આવતા અને સગપણમાં કાકા એવા વિક્રમભાઈ માડમ સામે ચૂંટણી જીતવા તેમને સ્વર્ગસ્થ પિતા હેમતભાઈ માડમએ આ વિસ્તારમાં કરેલા કામોની મદદ મળી છે. હેમતભાઈ ચોથીથી સાતમી ગુજરાત વિધાનસભાના ચાર મુદત (1971થી 1990) માટે ચૂંટાયેલા અપક્ષ ધારાસભ્ય હતા. પિતાથી વિરૂદ્ધ જાહેર સેવાનો કોઈ અનુભવ નહીં ધરાવનાર પુનમબહેન મહુવાના પૂર્વ ભાજપી ધારાસભ્ય ડૉ. કનુભાઈ કલસરિયાની સાઇકલયાત્રામાં એકવાર પેડલ મારીને વાયા વિધાનસભા પાર્લમન્ટમાં પહોંચી ગયા છે. જામનગર જિલ્લાના દરિયાકાંઠા સંબંધી પ્રશ્નોને સારી રીતે સમજવા પુનમબહેનને નૌકાદળમાં અધિકારી એવા પતિ મહાશયની મદદ મળી રહેશે અને સરવાળે મતદાર નાગરિકોનું ભલું થશે. ગુજરાતની છવ્વીસ બેઠકોમાં સૌથી વધુ ચોવીસ હરીફ ઉમેદવારો ધરાવતી બેઠક પર સગા કાકાને પરાજિત કરનાર પુનમ માડમ આ બેઠક પરથી ચૂંટાયેલા પ્રથમ મહિલા સંસદસભ્ય છે. ઉમેદવારી કરતા એફિડેવિટમાં પોતાની પાસે સૌથી વધુ સોનાની સંપત્તિનો ઉલ્લેખ કરનાર પુનમબહેન માત્ર બી.કૉમ થયેલા છે અને ઉંમરની રીતે સંસદપ્રવેશ પછી ચાલીસ પાર કરવાના છે.

2004ની ચૌદમી લોકસભાની ચૂંટણી સાડી ત્રણસો મતથી હારી જનાર અને 2009ની પંદરમી લોકસભાની ચૂંટણી 58,000 મતોથી જીતી જનાર દાહોદની અનામત બેઠકના સોળમી લોકસભાના કૉંગ્રેસના એકમાત્ર મહિલા ઉમેદવાર ડૉ. પ્રભાબહેન કિશોરભાઈ તાવિયાડ આ વખતે 2,30,000 મતોના માર્જિનથી હારી ગયા છે. સીધી હરીફાઈમાં મહિલાની સામે અન્ય પક્ષની મહિલા ઉમેદવાર હોય તેવી આ ચૂંટણીની એકમાત્ર બેઠક એવા મહેસાણામાં ‘આમ આદમી પાર્ટી’ના ભાજપી કુળના ઉમેદવાર વંદનાબહેન દિનેશકુમાર પટેલની ડિપોઝિટ ડુલ થઈ ગઈ હતી એ સહજ જાણ માટે.

જયાબહેન શાહ
(બીજીથી ચોથી લોકસભામાં ગુજરાતનું પ્રતિનિધિત્વ)
ગુજરાતની ચાર મહિલા ઉમેદવારો સંસદમાં ચૂંટાઈ છે તો જાહેરજીવન થકી પાંચમાં પૂછાય તેવા ગુજરાતના પૂર્વ મહિલા સાંસદ જયાબહેન શાહ ચૂંટણી પ્રક્રિયા ચાલતી હતી તે દરમિયાન જ 14મી એપ્રિલના રોજ બાણું વર્ષની વયે અવસાન પામ્યા. તેમની વિદાયની સખેદ નોંધ લેતા એ જાણવું જરૂરી છે કે અલગ સૌરાષ્ટ્ર રાજ્ય (કાઠિયાવાડ સ્ટેટ)ના શિક્ષણમંત્રી રહી ચૂકેલા જયાબહેન શાહ બીજી લોકસભામાં મુંબઈ રાજ્યની ગિરનાર લોકસભા બેઠક તેમજ ત્રીજી અને ચોથી લોકસભામાં ગુજરાતની અમરેલી બેઠક પરથી ચૂંટાયેલા સભ્ય હતા અને હિન્દી ભાષા પ્રચાર, ખાદી વણાટ, નિસર્ગોપચાર અને નશાબંધી જેવા રચનાત્મક – સર્વોદયી લોકકલ્યાણના કાર્યો સાથે છેવટ સુધી સંકળાયેલા હતા. છેવટ સુધી એટલા માટે કેમ કે મૃત્યુ પછી તેમના પાર્થિવ દેહનું અમદાવાદની બી.જે. મેડિકલ કૉલેજને દાન કરવામાં આવ્યું હતું.

‘મહિલા અનામત બિલ’નો વિરોધ કરનારા સમાજવાદી પક્ષના ગણીને ચાર ઉમેદવારો સોળમી લોકસભામાં ઉત્તર પ્રદેશથી ચૂંટાયા છે. ગુજરાતના ચાર મહિલા સાંસદો વિરોધ કરનારાનો પણ વાજબી, બોલકો, બળૂકો વિરોધ કરીને આ બિલને વૈતરણી પાર કરાવે તેવી અપેક્ષા રાખવી જયાબહેન શાહએ કરેલા કામની સરખામણીએ વધારે તો નથી જ નથી એવી ખાતરી આપણે રાખી શકીએ કે કેમ એ તો આવનારા પાંચ વર્ષ જ કહેશે.

ભારતીય સંસદની વેબસાઇટ પર જયાબહેન શાહની વિગત જાણવા માટેની લિન્ક આ રહી – http://164.100.47.132/LssNew/biodata_1_12/1360.htm તો ગુજરાતના નાગરિક કે જે તે સંસદીય મતવિસ્તારના મતદાર તરીકે આપના જનપ્રતિનિધિનો સંપર્ક કરવાની જરૂર પડે તો આ રહ્યા તેમના સંપર્કસૂત્ર...
શ્રીમતી દર્શના જરદોસ (સુરત) – darshanajardosh@gmail.com
શ્રીમતી જયશ્રી પટેલ (મહેસાણા) – jk.patel@sansad.nic.in jkpatelgujarat@gmail.com
ડૉ. ભારતી શ્યાળ (ભાવનગર) – bharatibend.shiyal@sansad.nic.in
સુશ્રી પૂનમ માડમ (જામનગર) – poonam.maadam@sansad.nic.in


(તસવીરો : www.parliamentofindia.nic.in વેબસાઇટ પરથી)

Saturday, August 02, 2014

ફેસબુક : ફન, ફંડાઝ અને ફેક્ટ્સ (જુલાઈ – 2014)


(જુલાઈ – 2014)
સોશિયલ નેટવર્કિંગ સાઇટ પર જે કંઈ લખાય તેના અસ્તિત્વનું માપ સેકન્ડ – મિનિટોથી શરૂ કરીને થોડા કલાકો સુધી લંબાવી શકાય. પછી?...પછી એને ભૂલી જવાનું. આદર્શ વસ્તુસ્થિતિ એને ભૂલી જવામાં જ છે. પરંતુ અહીં બ્લોગની દિવાલ પર તેને કોપી-પેસ્ટ કરવા પાછળના બે આશય છે.
એક તે એનું અસ્તિત્વ થોડા મહિના-માસ લંબાવવાનું અને બીજો તે જેઓ સોશિયલ નેટવર્કિંગ જગતમાં દાખલ નથી થયા અથવા દાખલ થયા પછી દૂર થયા છે તેમના સુધી પહોંચવાનો.
આ રીતે દર મહિને Control ‘A’ – Control ‘C’ – Control ‘V’ની મદદથી રજૂ થવાના વિચારને 2012માં અમલમાં મૂક્યા પછી તેને નિયમિત કરતાં એ ક્રમમાં આ 45મી પોસ્ટ છે.
2010ના વર્ષની એક અને 2011, 2012 અને 2013ના વર્ષની મહિનાવાર સ્ટેટસ પ્રોફાઇલ પોસ્ટ રજૂ કર્યા પછી પ્રસ્તુત છે હવે જુલાઈ – 2014. જે તે દિવસના વાર, તારીખ અને સમયના ઉલ્લેખ નીચે એ દિવસનું સ્ટેટસ અપડેટ છે.ફેસબુક’ / FACEBOOK પર આવા દરેક સ્ટેટસ અપડેટ સાથે મારું નામ અને કૌંસમાં ગામનું નામ અમદાવાદ’ / Ahmedabad એમ લખતો હોઉં છું પરંતુ અહીં એમ કરવું જરૂરી નથી લાગતું. હા, ડમડમબાબા એ બ્લોગલેખકના અસ્તિત્વનો જ એક ભાગ છે.
આભાર.

(Wednesday, 2 July 2014 at 01:11pm)
ગુજરાતના બાંધકામ ઉદ્યોગને મદદરૂપ થવા એક નવી બૅન્કની શરૂઆત થવાની છે...તેનું નામ છે...
BANK – બિલ્ડર આપઘાત નિવારણ કેન્દ્ર
* * * * * * *

(Wednesday, 2 July 2014 at 04:25pm)
अच्छे दिन आ गये
ગુજરાતમાં અગાઉ ખેડૂતો આપઘાત કરતા હતા...હવે...
...બિલ્ડરો જીવન ટૂંકાવવા માંડ્યા...અચ્છે દિન આ ગયે...
* * * * * * *

(Friday, 4 July 2014 at 02:34pm)
રાજ કપૂરએ 1973માં બોબીફિલ્મનું નિર્માણ દિગ્દર્શન કર્યું હતું અને 1982માં આવેલી ફિલ્મ ગોપીચંદ જાસૂસમાં મુખ્ય ભૂમિકામાં અભિનય કર્યો હતો...
...વિદ્યા બાલન અભિનિત આજે 2014માં રજૂ થઈ રહેલી ફિલ્મનું નામ છે બોબી જાસૂસ...
ફિલ્મ ક્ષેત્રનું તદ્દન બીનફિલ્મી સંશોધન by ડમડમબાબા...
* * * * * * *

(Monday, 7 July 2014 at 01:05pm)
અમદાવાદમાં ઘર બહાર જમવા જવાનું મન થાય તો રેસ્ટોરન્ટની પસંદગી કરવામાં બહુ સમય બગાડવો નહીં...કેમ કે...તમામ હોટલની તમામ સબ્જીની ગ્રેવી ચાંગોદરમાં એક જ ઠેકાણે તૈયાર થઇને તમામ જગ્યાએ પહોંચાડવામાં આવે છે.
નોંધ : પ્રોફાઇલ સ્ટેટસની વિગતો અહીં તમામએટલે કે પૂર્ણ થયેલી જાહેર કરવામાં આવે છે.
નોંધની નોંધ : ચાંગોદર = અમદાવાદની પશ્ચિમે આવેલો ઔદ્યોગિક વિસ્તાર
* * * * * * *

(Wednesday, 9 July 2014 at 02:22pm)
કેમ છો શર્મિષ્ઠાબહેન, વહેલા-વહેલા પરવારી ગયાને કંઈ...
જૂઓને શકુંતલાબહેન, આ જ્યારથી બુલેટ ટ્રેન પસાર થવાની શરૂ થઈ છે...તેના પવનથી કપડાં વહેલા સુકાઈ જાય છે. એટલે...
રેલવે બજેટમાં જાહેર કરેલી અમદાવાદ મુંબઈ બુલેટ ટ્રેન ખરેખર પાટા પર દોડતી થશે એવી આશા સેવતા ડમડમબાબાની ડાયલૉગ સિરીઝ...
* * * * * * *

કેશુભાઈ પટેલના ગુજરાતના મુખ્યમંત્રીપદે રહેતાં 2001માં બંધ પડેલી બૅન્કનું
પોસ્ટર પકડનાર પ્રકાશ ગુર્જર 
(મધ્યમાં) 2014માં ભાજપના હોદ્દેદાર છે
(Thursday, 10 July 2014 at 12:22pm)
સમાચાર છે કે...ગુજરાતના ધારાસભ્ય અને સહકારી ક્ષેત્રના અગ્રણી અમિત શાહની ગઈકાલે ભારતીય જનતા પક્ષના રાષ્ટ્રિય અધ્યક્ષપદે વરણી કરવામાં આવી છે...અને...
ગુજરાતના સહકાર ક્ષેત્રની અગ્રણી એવી માધવપુરા બૅન્કને અંગત આર્થિક લાભ માટે ફડચામાં લઈ જનાર શેરદલાલ કેતન પારેખનો સુપ્રિમ કૉર્ટમાં બચાવ કરનાર વકીલ અને રાજ્યસભામાં ગુજરાતમાંથી ચૂંટાયેલા સંસદસભ્ય અરૂણ જેટલી નાણામંત્રીની રૂએ આજે સોળમી લોકસભાનું પ્રથમ અંદાજપત્ર રજૂ કરી રહ્યા છે.
* * * * * * *

(Friday, 11 July 2014 at 12:00 Noon)
બગદાદીબાબાએ ગઈકાલે 10મી જુલાઈએ રજૂ થયેલા બજેટની તમામ દરખાસ્તોનો વિસ્તૃત અભ્યાસ કરી લીધો છે...
અર્થશાસ્ત્રને સમજવા માટે અત્યંત જરૂરી ગણાય તેવા દેશીહિસાબના પ્રિન્ટીંગ ખર્ચ કે તેની એન્ડ્રોઇડ એપ્લિકેશન ફી પર કોઈ સબસિડી જાહેર કરવામાં આવી નથી.
(નોંધ બગદાદીબાબા એ ડમડમબાબાનું ઑલ્ટર્નટ નામ છે જેનો ઉપયોગ પવિત્ર રમઝાન માસ દરમિયાન મર્યાદિત રહેશે.)
* * * * * * *

(Sunday, 13 July 2014 at 05:35pm)
અમદાવાદના બે મિત્રો નામે કેતકી જોશી / Ketki Joshi https://www.facebook.com/ketkijoshi10 (વ્યવસાયી મેનેજમેન્ટ નિષ્ણાત, સંશોધક અને લેખક) અને દિવ્યેશ વ્યાસ / Divyesh Vyas https://www.facebook.com/divyesh.vyas.94 (‘સંદેશ’ દૈનિક સાથે જોડાયેલા પત્રકાર)એ આજે તેમના જીવનનું પહેલું રક્તદાન કર્યું. આ સંદર્ભે આનંદ વ્યક્ત કરતો દિવ્યેશનો SMS આવ્યો તેના પ્રતિભાવમાં...
Wel-Come to the Blood Donors League…
* * * * * * *

(Monday, 14 July 2014 at 01:40pm)
આ લોકોનું કંઈ કહેવાય નહીં...
હાલમાં ચાલતી દરેક સુપરફાસ્ટ ટ્રેનના એકે-એક કોચમાં બુલેટ મોટર-સાઇકલ ગોઠવી દે ને કહી દે કે આવી ગઈ બુલેટ ટ્રેન’...
7મી જુલાઈએ રેલવે બજેટ રજૂ થયાના અઠવાડિયા પછી ફરી એકવાર બજેટને...સોરી બુલેટને યાદ કરતાં...આ લોકોનું કંઈ કહેવાય નહીં...
* * * * * * *

હાફિઝ સઈદ અને વેદપ્રતાપ વૈદિક
સરહદપારની શેતાની ‘ભાઈબંધી’
(Tuesday, 15 July 2014 at 03:00pm)
જૂન જુલાઈમાં પાકિસ્તાનની મુલાકાત કરી ચૂકેલા હિન્દીભાષી પત્રકાર વેદપ્રતાપ વૈદિકનો તદ્દન ટૂંકો ઇન્ટરવ્યૂ...
મુંબઈ પરના આતંકી હુમલાના માસ્ટરમાઇન્ડ અને મોસ્ટ વોન્ટેડ ક્રિમિનલ એવા હાફિઝ સઈદની અંગત મુલાકાત કરવાની પ્રેરણા આપને ક્યાંથી મળી?
નકલી એન્કાઉન્ટર કરનારા તેમજ નિર્દોષ કૌસરબીને મોતને ઘાટ ઉતારવાના આરોપી પોલિસ અધિકારી ડી.જી. વણઝારાની સાબરમતી જેલની ખોલીમાં જઈ અંગત મુલાકાત કરનાર ગુજરાતના લેખક ગુણવંત શાહ પાસેથી.”...“ખરેખર?
હા. ગુજરાત મૉડલનું અનુસરણ કરવું મને ગમે છે.
* * * * * * *

(Wednesday, 16 July 2014 at 12:55pm)
ભૂતકાળમાં અથવા તો પૂર્વાશ્રમમાં ગુજરાતની ખખડધજ ST બસમાં અથડાતા-કૂટાતા NGOવાળા હવે ગુજરાતના હાલોલ ગામના ઔદ્યોગિક વિસ્તારમાં જ ઉત્પાદિત થતી Ford કંપનીની SUVમાં મહાલતા થઈ ગયા છે.
* * * * * * *

(Thursday, 17 July 2014 at 01:00pm)
કેટલીક સંસ્થાઓની મિટિંગ કાર્યક્રમમાં એકપણ મહિલા (I mean પરી) ઉપસ્થિત ન હોય તોય અહેવાલમાં લખશે પરિસંવાદ યોજાયો હતો.
પરી વગરનો પરિસંવાદ...
* * * * * * *

(Friday, 18 July 2014 at 02:30pm)
એફિલ ટાવરને થોડો કાટ ચઢ્યો હોય એમ લાગે છે.
એમ? કેમ કરતા ખબર પડી?
જ્યાંને ત્યાં પોસ્ટર્સ ચોંટાડતા કેટલાક વેપારીઓ ત્યાં એમ કરવામાં નિષ્ફળ ગયા એટલે...” ડમડમબાબા ડાયલૉગ સિરીઝ.....
* * * * * * *

(Tuesday, 22 July 2014 at 02:00pm)
કેટલાક લોકો ખરીદીની બાબતમાં એટલા બધા ચોક્કસ હોય કે લોખંડનો ટનનો ભાવ અને પતરાંનો ગેજ પૂછ્યા પછી પણ છેવટે ખરીદે તો જીભ સાફ કરવાનું ઊલિયું, દાઢી કરવાની બ્લેડ કે પછી સ્ટેપલર પીન.
* * * * * * *

(Monday, 28 July 2014 at 01:20pm)
શ્રાવણ મહિનાની સલાહ...
ચોમાસુ નબળું હોય કે ઉત્તમ...ગત ચોમાસામાં બંધબેસતો રેઇનકોટ આવતા ચોમાસામાં પણ માપસર આવી રહે એટલા માટે પણ વજનને માપમાં રાખવું.
* * * * * * *

દર્દી અને દાક્તર : શિલ્પા બિનીત મોદી અને ડૉ. રાજ મંડોત (*)
(Tuesday, 29 July 2014 at 06:30pm)
આજે શિલ્પાનો જન્મદિવસ છે...અને તે ફેસબુકપર નથી...
...અને ફેસબુકની પરંપરા એવી છે કે આવા ખાસ દિવસે જીવનસાથી કે મમ્મી પપ્પા (અથવા સાસુ સસરા) સાથેનો ફોટો મુકવો...અને યાદગીરીરૂપ કશુંક લખવું...
...મારા માટે આ ફોટો એવો જ યાદગાર છે...શિલ્પાની સાથે ડૉ. રાજ મંડોત છે...વ્યવસાયે નેફ્રોલોજિસ્ટ...કિડની સંબંધિત રોગોના નિષ્ણાત...મચ્છર કરડવાની પ્રતિક્રિયારૂપે થયેલા ફાલ્સીપારમ / Falciparum અને મલ્ટીપલ ઑર્ગન્ ફેલ્યોરને લઈને સોમવાર8 નવેમ્બર 2004ની મધરાતે સર્જાયેલી કટોકટીમાં શિલ્પાનો જીવ બચાવનાર વ્યક્તિ એટલે ડૉ. રાજ મંડોત...આજકાલ કહેતાં એ ઘટનાને દસ વર્ષ થશે.
સારવારનું સ્થળ : સ્ટર્લિંગ હૉસ્પિટલ, ગુરુકુળ, મેમનગર, અમદાવાદ.
દસમા વર્ષે ફોટો પડાવ્યાનું સ્થળ : દેવસ્ય હૉસ્પિટલ, નવા વાડજ, અમદાવાદ.
* * * * * * *

(Thursday, 31 July 2014 at 11:35am)
સાહેબ, ડ્રાઇવિંગ લાઇસન્સ લેવા આવ્યો છું.
હલેસાં મારતાં આવડે છે?
સાહેબ...મારે તો ટુ-વ્હીલરનું લાઇસન્સ જોઇએ છે.
ભઈલા...એટલે જ તો પૂછું છું કે...હલેસાં મારતાં આવડે છે...અમદાવાદમાં સ્કૂટર ચલાવવું હોય તો એ આવડત જરૂરી છે...
જા...પ્રૅક્ટિસ કરીને આવ. ફોર-વહીલરનું લાઇસન્સ પણ આપી દઇશ.
આર.ટી.ઓ ઑફિસમાં ડમડમબાબા ડાયલૉગ સિરીઝ.....

ગયા મહિને અહીં મુકેલી જૂન – 2014ના પ્રોફાઇલ સ્ટેટસની પોસ્ટ લિંક આ રહી –

.....તેમજ ગત વર્ષોમાં અહીં મુકેલી જુલાઈ – 2011, જુલાઈ – 2012 તેમજ જુલાઈ 2013ના પ્રોફાઇલ સ્ટેટસની પોસ્ટ લિંક અનુક્રમે આ રહી –

http://binitmodi.blogspot.in/2012/08/2011.html

(* નિશાની વાળી તસવીર : બિનીત મોદી, એ સિવાયની સંબંધિત તસવીરો અને ઇમિજસ : નેટ પરથી)