ફેસબુક : ફન, ફંડાઝ અને ફેક્ટ્સ (માર્ચ – 2012, ભાગ – 1)

(માર્ચ – 2012, ભાગ - 1)

સોશિયલ નેટવર્કિંગ સાઇટ પર જે કંઈ લખાય તેના અસ્તિત્વનું માપ સેકન્ડ – મિનિટોથીશરૂ કરીને થોડા કલાકો સુધી લંબાવી શકાય. પછી?...પછી એને ભૂલી જવાનું. આદર્શ વસ્તુસ્થિતિ એને ભૂલી જવામાં જ છે. પરંતુ અહીં બ્લોગની દિવાલ પર તેને કોપી-પેસ્ટ કરવા પાછળના આશય માત્ર બે જ છે.

એક તે એનું અસ્તિત્વ થોડા મહિના-માસ લંબાવવાનું અને બીજો તે જેઓ સોશિયલ નેટવર્કિંગ જગતમાં દાખલ નથી થયા તેમના સુધી પહોંચવાનો.

આ રીતે દર મહિને Control ‘A’ – Control ‘C’ – Control ‘V’ની મદદથી રજૂ થવાનો વિચાર છે. આનો અમલ કરવાની કોઈ નિશ્ચિત તારીખ નથી તેમ આ ક્યાં સુધી ચલાવવું તે ય નિશ્ચિત નથી. હા, પ્રતિભાવ – કમેન્ટસ્ એ નક્કી કરવામાં ચોક્કસ મદદરૂપ થશે.

એ રીતે માર્ચ – 2013ના સ્ટેટસ અપડેટ આ મહિનાના પ્રારંભે અહીં મુક્યા પછી હવે પ્રસ્તુત છે ગત વર્ષના આ સમયગાળાના પ્રોફાઇલ સ્ટેટસ. જે તે દિવસના વાર, તારીખ સમયના ઉલ્લેખ નીચે એ દિવસનું ‘સ્ટેટસ અપડેટ’ છે. ‘ફેસબુક’ / FACEBOOK પર આવા દરેક સ્ટેટસ અપડેટ સાથે મારું નામ અને કૌંસમાં ગામનું નામ ‘અમદાવાદ’ / Ahmedabad એમ લખતો હોઉં છું પરંતુ અહીં એમ કરવું જરૂરી નથી લાગતું.

આભાર.

(Friday, 2 March 2012 at 01:20am)

ગુટકાના આગમને પાન – મસાલાના ગલ્લાની, ફોટો કોપીયર મશીનના આગમને ઝેરોક્ષની દુકાનોની, એસ.ટી.ડી. ટેલિફોન સુવિધાના આગમને પી.સી.ઓ સેન્ટરની, મુક્ત અર્થતંત્રના આગમને સરકારી – સહકારી કે ખાનગી બેન્કો અને એ.ટી.એમની, મોબાઇલના આગમને ઇલેક્ટ્રૉનિક્સ શોપની સંખ્યા વધી. બસ, એના પ્રમાણમાં જાહેર શૌચાલયો ના બનાવી શક્યા.

* * * * * * *

(Friday, 2 March 2012 at 07:45pm)

ઉત્તર પ્રદેશમાં આવતીકાલે ત્રીજી માર્ચે સાતમા અને છેલ્લા તબક્કાનું મતદાન વિના વિઘ્ને સંપન્ન થઈ જાય એ ઘડીની રાહ ચૂંટણી પંચ, રાજકીય પક્ષો, રાજકારણીઓ અને મતદારોની સાથે માયાવતીના પેલા હાથીઓ પણ જુએ છે. શિયાળો – ઠંડી ચાલ્યા ગયા છે એટલે તેઓ પણ ચૂંટણી પંચે પહેરાવેલા 'આચારસંહિતા' બ્રાન્ડ સ્વેટરથી મુક્તિ ઝંખે છે.

* * * * * * *

સુનીલ શેટ્ટી

(Saturday, 3 March 2012 at 05:55pm)

‘સુનીલ શેટ્ટીની તમામ ફિલ્મોના રાઇટ્સ મેળવી લેવાનો વિચાર છે.’

‘ડાઈ હાર્ડ ફેન લાગો છો એના? એ ફિલ્મો બતાવવા માટે કોઈ ચેનલ સાથે વાટાઘાટો ચાલે છે કે શું?’.....‘અરે, ફેનની ફુદરડી ફેરવો પંખા પર. હું તો ભાવિ પેઢી તેની ફિલ્મો જોઈ ના શકે તેની વેતરણમાં આમ કરવા માગું છું. આખરે બાળકો પ્રત્યે પણ આપણી કોઈ જવાબદારી છે કે નહીં?’

* * * * * * *

(Tuesday, 6 March 2012 at 10:40pm)

પાંચ રાજ્ય વિધાનસભા ચૂંટણી (ઉત્તર પ્રદેશ, પંજાબ, ઉત્તરાખંડ, મણિપુર અને ગોવા : ફેબ્રુઆરી-માર્ચ 2012) પરિણામોમાં સૌથી રસપ્રદ પરિણામ ઉત્તરાખંડમાંથી મળ્યું છે. ભ્રષ્ટાચારના મામલે ચૂંટણીના છ મહિના અગાઉ મુખ્યમંત્રીપદેથી હઠાવાયેલા રમેશ પોખરિયાલ ‘નિશંક’ ચૂંટણી જીતી ગયા છે અને તેમના સ્થાને બેસાડાયેલા ભુવનચંદ્ર ખંડુરી વિધાનસભામાં લોકપાલ બિલ પસાર કરાવ્યા પછી પણ ચૂંટણી હારી ગયા છે.

* * * * * * *

(Tuesday, 6 March 2012 at 10:51pm)

સાઇકલના ઉત્પાદકોએ આવતીકાલથી ઉત્તર પ્રદેશમાં તેમની પ્રોડક્ટ બૉડી કવર સાથે વેચવી પડશે. સાઇકલના ચૂંટણી ચિહ્ન વડે બહુમતી બેઠકો સાથે વિજેતા થયેલી સમાજવાદી પાર્ટી પાંચ વર્ષ પછી 2017માં ફરીથી ચૂંટણીના મેદાનમાં ઉતરશે ત્યારે ચૂંટણી પંચની આચારસંહિતા પૂરી કરવા સાઇકલની સાથે આપેલા બૉડી કવર કામમાં લાગશે.

* * * * * * *

(Wednesday, 7 March 2012 at 07:50pm)

કમ્પ્યૂટર જગતમાં ઇન્ટરનેટના આગમન પછી પુરા વિશ્વમાં કુકિઝ બે જગ્યાએ બને છે. એક બિસ્કિટ – નાનખટાઈ બનાવતી બેકરીમાં અને બીજી જગ્યા તે ઈન્ટરનેટની સુવિધા ધરાવતી કમ્પ્યૂટર સિસ્ટમમાં. કોઈ પણ વેબસાઇટની મુલાકાત લેતા જ તે આપોઆપ બનવા લાગે છે. (સતીશ કર્મકર ઉર્ફે સ્ટીવ જોબ્સનું સંશોધન)

નોંધ: સ્ટીવ ઉર્ફે સતીશે આવું કોઈ સંશોધન કર્યું નથી. કરે પણ નહીં. આ તો થોડા.....આપ જાણો છો એવા ‘શુભ’ આશયથી જ ઠપકારી દીધું છે.

* * * * * * *

દીનેશ ત્રિવેદી

(Saturday, 10 March 2012 at 06:01pm)

‘જીવન ક્ષણભંગુર છે’ – દુનિયાની દરેક ભાષામાં આ વાક્ય એક યા બીજી રીતે કહેવાયું જ હશે એમ ધારી લઈને ગુજરાતીમાં તે અહીં ઉતાર્યું છે. કોઈ પણ વ્યક્તિએ તેના જીવનકાળ દરમિયાન કોઈને કોઈ તબક્કે આ વાક્ય અચૂક સાંભળ્યું જ હશે તેમ ધારી લઈએ તો પણ હું ખાતરીપૂર્વક કહી શકું છું કે એક ગુજરાતીએ આ વાક્ય નથી સાંભળ્યું. તેમનું નામ છે દીનેશ ત્રિવેદી – ભારતના રેલવે પ્રધાન. જો તેમણે સાંભળ્યું હોત તો રેલવે રિઝર્વેશન 120 દિવસ – ચાર મહિના અગાઉ કરાવવું પડે તેવો નિયમ આજથી લાગુ ન કરત.....‘જીવન ક્ષણભંગુર છે’ – સેકન્ડ પછીની ખબર નથી તો ચાર મહિના પછીના ઑગસ્ટની પ્રવાસ યોજનાઓ એપ્રિલમાં ઘડવાની ખબર કેમ કરીને પડે?

* * * * * * *

(Sunday, 11 March 2012 at 03:33pm)

ચૂંટણીકારણના પોથીપંડિતો વિધાનસભા ચૂંટણીના પરિણામો પહેલા ઉત્તર પ્રદેશમાં રાષ્ટ્રપતિ શાસનની આગાહી કરતા હતા. સમાજવાદી પાર્ટીને એવી બહુમતી મળી કે આગામી જુલાઈમાં યોજાનારી રાષ્ટ્રપતિપદની ચૂંટણીનો ઉમેદવાર નક્કી કરવામાં પક્ષ અને તેના ધારાસભ્યો ચાવીરૂપ ભૂમિકા ભજવશે. એવી ભૂમિકા કે કોઈ પણ રાજ્યમાં રાષ્ટ્રપતિ શાસન સ્થાપવાનો નિર્ણય લેનાર રાષ્ટ્રપતિપદના ઉમેદવારના નામનો નિર્ણય લેવાનું કામ ઉત્તર પ્રદેશમાં થશે.

* * * * * * *

(Monday, 12 March 2012 at 05:25pm)

'મેનેજર સાહેબ, ખાતું ખોલાવવું છે.'.....'આ રિઝર્વ બેન્ક છે. અહીં તમારા જેવા સામાન્ય નાગરિક – ગ્રાહકનું ખાતું ના ખુલે. કોણે તમને અહીં મોકલ્યા?'.....'જ્યાં બચત ખાતું છે એ બેન્કવાળાએ જ અહીં મોકલ્યા છે. એ લોકો કહે છે ફાટેલી નોટો બદલાવવી હોય તો રિઝર્વ બેન્કમાં જાઓ. તે મને થયું આયો છું તો જોડે – જોડે ખાતું પણ ખોલાવતો જવું. ફરીથી આવવાનું થાય ત્યારે કામ લાગે.'

* * * * * * *

(Monday, 12 March 2012 at 05:55pm)

કસરત કે યોગ ના કરી શકતા હોવ અને છતાં શરીરનો બાંધો મજબૂત કરવા ઈચ્છતા હો તો એક રામબાણ ઉપાય મેં ખોળી કાઢ્યો છે. અજમાવી જુઓ. પોળ, શેરી, સોસાયટી કે એપાર્ટમેન્ટ જ્યાં રહેતા હો તે જગ્યાએ ઘરના ઓટલા – ઓસરી કે બાલ્કનીમાં પહોંચી જાઓ. તમારી જાતિ (સ્ત્રી કે પુરુષ) પ્રમાણે જે નામ પહેલું યાદ આવે તે નામની મોટેથી બુમ પાડો. જેમ કે 'પરમસુખભાઈ'. તમે ગમે તેટલી બુમો પાડશો, કોઈ હોંકારો પણ નહિ ભણે. એટલા માટે કે તે નામધારી કોઈ વ્યક્તિ તમારી આજુ-બાજુ રહેતી જ નહીં હોય. ધારોકે રહેતી હશે તો તેને તમારો અવાજ અજાણ્યો લાગશે એટલે પણ હોંકારો નહીં ભણે. આમ કરવાથી તમારા ફેફસા મજબૂત થશે. ફરીથી કહું છું – અજમાવી જુઓ. નોંધ: નથી માનતા. ના માનશો. બાકી મેં આ ટ્રીક અજમાવેલી છે. છેલ્લા મહિનામાં કેટલાક મિત્રો – સગાં-સંબંધીઓને ઘરે જઈને પણ અજમાવી છે. હજી સુધી કોઈએ 'એ હા' કે 'હોં' કહ્યું નથી. બીજી તરફ ફેફસા મજબૂત થઈ રહ્યા છે.

* * * * * * *

(Monday, 12 March 2012 at 08:25pm)

આજથી બ્યાસી વર્ષ અગાઉ 12 માર્ચ 1930ના રોજ આરંભાયેલી દાંડી યાત્રામાં ગાંધીજી સાથે જોડાયેલા 78 પદયાત્રીઓમાંના મોટા ભાગનાની સ્મૃતિ 'સામાન્ય' લેખાય તેવા ફોટા રૂપે પણ સચવાઈ નથી. આજથી સાઇઠ વર્ષ અગાઉ 1952માં યોજાયેલી પ્રથમ લોકસભાની 'સામાન્ય' ચૂંટણીઓ સમયે જ મતદાર ઓળખપત્રનો નિયમ અમલી હોત તો આ 'અસામાન્ય' પદયાત્રીઓની કમ-સે-કમ એક યાદગીરી આપણી પાસે ચોક્કસ જળવાઈ રહેતી.

* * * * * * *

(Tuesday, 13 March 2012 at 06:10pm)

'હોળી – ધૂળેટી વીતે પાંચ દિવસ થયા છતાં આ લોકો રંગ – ગુલાલ સાફ કરી નાહી-ધોઈને ચોખ્ખા ચણક કેમ નથી થતા?'.....'ઓળખાઈ ના જવાય એટલે.'.....'લેણદારો આજુ બાજુ ફરકે છે કે શું?'.....'ના રે ના. એ લોકો ઉત્તર પ્રદેશના કોંગ્રેસીઓ છે.'

* * * * * * *

(Wednesday, 14 March 2012 at 05:40pm)

આજે રેલવે બજેટ રજૂ કરનાર દિનેશ ત્રિવેદી પહેલા ગુજરાતી છે જેઓ કેન્દ્ર સરકારમાં રેલવે પ્રધાન થયા હોય. પાંસઠ વર્ષે પહેલીવાર કોઈ ગુજરાતીનો રેલવે પ્રધાન થવાનો 'વારો' આવ્યો પણ ભાડાં વધારીને મુસાફર પ્રજાનો 'વારો' કાઢ્યો. ગુજરાતમાંથી ચૂંટાયેલા એક પણ સંસદસભ્ય રેલવે પ્રધાનના પદે પહોંચ્યા નથી. હા, 1996માં ગાંધીનગર લોકસભા બેઠક પરથી ચૂંટાયેલા અટલ બિહારી વાજપેયીએ તેર દિવસની સરકારમાં વડાપ્રધાન પદની સાથે રેલવે પ્રધાનનો હોદ્દો-હવાલો પણ સંભાળ્યો હતો.

* * * * * * *

(Wednesday, 14 March 2012 at 10:05pm)

પેટ્રોલ ખરીદવાના છૂટા રૂપિયા ના હોય અને કિંગફિશરની ફ્લાઇટ ટેક-ઓફ ના થઈ શકે એવા સંજોગોમાં જે તે હવાઈયાત્રીઓને ટ્રેનના પેસેન્જર તરીકે સમાવી શકાય એ દિશામાં કોઈ જ વિચાર કર્યા વગર કે તે બાબતે કોઈ નિર્ણય જાહેર કર્યા વિના રેલવે પ્રધાન દિનેશ ત્રિવેદીએ વિજય માલ્યાને ખૂબજ અન્યાય કર્યો છે. ત્રિવેદી સાહેબ, આપ લાઇસન્સધારી પાઇલટ છો એટલો અંગત બાયોડેટા તો યાદ રાખવો તો.

* * * * * * *

(Thursday, 15 March 2012 at 04:20pm)

રેલવે પ્રધાન દિનેશ ત્રિવેદીએ બજેટ રજુ કર્યા પછી રાજીનામું આપ્યું હોય તો સ્વીકારાઈ જાય અને ના આપ્યું હોય તો લખીને આપી દે એવું વિજય માલ્યા ઈચ્છી રહ્યા છે. કમ-સે-કમ કિંગફિશર એરલાઇન્સને એક પાઇલટ તો મળે. પગાર જે કહે એ. બેન્કમાંથી લોન લઈને જ આપવાનો છે ને.

* * * * * * *

પ્રકાશ સિંઘ અને સુખબીર સિંઘ બાદલ

મુલાયમસિંહ અને અખિલેશ યાદવ

(Thursday, 15 March 2012 at 04:25pm)

રાજકીય જગતના આજે બે જ સમાચાર છે. એક – પ્રકાશ સિંઘ બાદલ ગઈકાલે પંચાસી (85) વર્ષની ઢળતી ઉંમરે પાંચમી વાર પંજાબના મુખ્યમંત્રી પદે બેસી ગયા. દીકરા સુખબીર સિંઘ બાદલને નાયબ મુખ્યમંત્રી પદે જ બેસાડી રાખ્યો.....અને.....બીજા – અખિલેશ યાદવ આજે ઓગણચાલીસ (39) વર્ષની યુવાન વયે પહેલી વાર ઉત્તર પ્રદેશના મુખ્યમંત્રી પદે આવ્યા. પિતા મુલાયમ સિંહ યાદવે દીકરાને રાજકારણમાં આગળ વધવા જગ્યા કરી આપી.

નોંધ: અખિલેશ યાદવ ઉંમરમાં પ્રકાશ સિંઘ બાદલથી અડધાથી પણ ઓછી વયના છે.

આ અગાઉ અહીં મુકેલી માર્ચ – 2013ના પ્રોફાઇલ સ્ટેટસની પોસ્ટ લીંક આ રહી – http://www.binitmodi.blogspot.in/2013/04/2013.html

(સંબંધિત તસવીરો અને ઇમિજસ : નેટ પરથી)

ફેસબુક : ફન, ફંડાઝ અને ફેક્ટ્સ (માર્ચ – 2013)

(માર્ચ – 2013)

સોશિયલ નેટવર્કિંગ સાઇટ પર જે કંઈ લખાય તેના અસ્તિત્વનું માપ સેકન્ડ – મિનિટોથી શરૂ કરીને થોડા કલાકો સુધી લંબાવી શકાય. પછી?...પછી એને ભૂલી જવાનું. આદર્શ વસ્તુસ્થિતિ એને ભૂલી જવામાં જ છે. પરંતુ અહીં બ્લોગની દિવાલ પર તેને કોપી-પેસ્ટ કરવા પાછળના આશય માત્ર બે જ છે.

એક તે એનું અસ્તિત્વ થોડા મહિના-માસ લંબાવવાનું અને બીજો તે જેઓ સોશિયલ નેટવર્કિંગ જગતમાં દાખલ નથી થયા તેમના સુધી પહોંચવાનો.

આ રીતે દર મહિને Control ‘A’ – Control ‘C’ – Control ‘V’ની મદદથી રજૂ થવાનો વિચાર છે. આનો અમલ કરવાની કોઈ નિશ્ચિત તારીખ નથી તેમ આ ક્યાં સુધી ચાલુ રાખવું તે ય નિશ્ચિત નથી. હા, પ્રતિભાવ – કમેન્ટ્સ એ નક્કી કરવામાં ચોક્કસ મદદરૂપ થશે.

જુલાઈ – 2012ના સ્ટેટસ પ્રોફાઇલથી પ્રારંભ કર્યા પછી પ્રસ્તુત છે હવે માર્ચ – 2013. જે તે દિવસના વાર, તારીખ સમયના ઉલ્લેખ નીચે એ દિવસનું ‘સ્ટેટસ અપડેટ’ છે. ‘ફેસબુક’ / FACEBOOK પર આવા દરેક સ્ટેટસ અપડેટ સાથે મારું નામ અને કૌંસમાં ગામનું નામ ‘અમદાવાદ’ / Ahmedabad એમ લખતો હોઉં છું પરંતુ અહીં એમ કરવું જરૂરી નથી લાગતું. હા, ડમડમબાબા એ બ્લોગલેખકના અસ્તિત્વનો જ એક ભાગ છે.

આભાર.

(Friday, 1 March 2013 at 11:45pm)

ડમડમબાબાનું ચોંકાવનારું સંશોધન.....ભારતના રાજકારણીઓ જાત-જાતના વચનો આપતા હોય છે...જેમ કે...‘હું મુંબઈને શાંઘાઈ બનાવી દઇશ’…અને...‘હું સુરતને સિંગાપોર બનાવી દઇશ’…વગેરે...આ વચનો સાંભળ્યા પછી ભારતના નાગરિકો હવે પ્રાર્થના કરવા લાગ્યા છે કે...‘આવતો જનમ ભારતમાં જ આપજે પણ શાંઘાઈ – સિંગાપોર બની જાય પછી.’

* * * * * * *

(Saturday, 2 March 2013 at 02:00pm)

ડમડમબાબાનું ચોંકાવનારું સંશોધન.....માર્ચ – એપ્રિલના પરીક્ષાના દિવસોમાં નાગરિક સમાજે ઘર – મકાનના રિનોવેશન (You Know નવીનીકરણ, જીર્ણોદ્ધાર!)ના કામકાજ હાથ ન ધર્યા હોત અને સુથાર – કડિયાના ‘સ્વરાંકનો’ ના સર્જાયા હોત તો.....તો ભારતમાં શિક્ષણની અને પરીક્ષાના પરિણામોની ટકાવારી ચોક્કસ ઊંચી હોત.....કોઈ શક...!

* * * * * * *

(*) ચવાણા સિવાયનું પણ 'મિક્સ' હોય

(Sunday, 3 March 2013 at 11:55pm)

ડમડમબાબાનું ચોંકાવનારું સંશોધન.....અમદાવાદમાં ‘મિક્સ’ શબ્દ જાહેરમાં ક્યાં-ક્યાં જોવા – વાંચવા મળે છે? એક – ભજિયાની દુકાને ‘મિક્સ ભજીયા’…..બે – ચવાણાની દુકાને ‘મિક્સ ચવાણુ’…..અને.....અને.....ત્રણ – બીઆરટીએસ ના રૂટ પર ‘મિક્સ ટ્રાફિક’

* * * * * * *

(Monday, 4 March 2013 at 11:55pm)

ડમડમબાબાનું ચોંકાવનારું સંશોધન અને ડાયલોગ સિરીઝ.....

“વ્યક્તિગત ફોટોગ્રાફી (પૉર્ટ્રિટ ફોટોગ્રાફી) ક્ષેત્રે વીસમી અને એકવીસમી સદી વચ્ચે નોંધપાત્ર ફેરફાર શું થયો?”...“વીસમી સદીમાં કેમેરામાં રોલ ફિક્સ કરીને ફોટોગ્રાફી થતી હતી, પછી ડિજિટલ ફોટોગ્રાફી શરૂ થઈ.”...“ના.”...“રોલ ફોટોગ્રાફીમાં ફોટો પડી ગયા પછી શિખાઉ ફોટોગ્રાફર પૂછતો હતો – ફ્લેશ થઈ ’તી?”…..“હવે ડિજિટલ ફોટો પડ્યા પછી ફોટો પડાવનાર કહે છે – બતાવો તો, કેવો આવ્યો છે?”

* * * * * * *

(Tuesday, 5 March 2013 at 11:59pm)

ડમડમબાબાનું ચોંકાવનારું સંશોધન ઉર્ફે ચોંકાવનારી આગાહી.....

આગામી દિવસોમાં ATM (ઓટોમેટેડ ટેલર મશીન)નો વપરાશ વધવાનો છે...કારણ કે ઉનાળો આવી રહ્યો છે....અને મફતમાં ઠંડી હવા ખાવા મળે તેવું દુનિયાનું એ એકમાત્ર સ્થળ છે.

* * * * * * *

(Thursday, 7 March 2013 at 02:00am)

ડમડમબાબાનો ચોંકાવનારો પ્રશ્ન.....

‘ABU ROAD’ થઈને ફરવા માટે આબુ જતા હઇએ તો અપભ્રંશ કરીને ‘ABROAD’ ગયા હતા એમ જણાવીએ તો સામાવાળા પર પ્રભાવ પડે ખરો?

* * * * * * *

(Friday, 8 March 2013 at 02:22am)

ડમડમબાબાની ગઈકાલ.....‘ફલાણા – ઢીકણા તો મારા ફ્રેન્ડ, ફિલોસોફર અને ગાઇડ છે.’.....અને આજકાલ.....‘ફલાણા – ઢીકણા તો મારા ફ્રેન્ડ, ફિલોસોફર, ગાઇડ અને નવનીત પણ છે.’

* * * * * * *

નવલોહિયા યુવાનોના જીવ હણી લેનારી

'કાળ'મુખી કાળી BMW

(Monday, 11 March 2013 at 07:10pm)

ડમડમબાબાનું ચોંકાવનારું સંશોધન અને સમાચાર.....ગુજરાતના નાગરિકો અને વિશેષ કરીને અમદાવાદ તેમજ આસપાસના ગામોના રહેવાસીઓના લાભાર્થે આવતીકાલથી અમદાવાદમાં એક નવુંનક્કોર પોલીસ સ્ટેશન શરૂ થઈ રહ્યું છે.....નામ છે.....BMW પોલીસ સ્ટેશન.....

(નોંધ: BMWથી ઘાયલ થયેલા લોકોએ પાટાપીંડી કરાવીને અને મૃત્યુ પામનારના સ્વજનોએ લાશના પોસ્ટ્મૉર્ટમ રિપૉર્ટની અસલ તેમજ બે નકલ સાથે લઈને પોલીસ સ્ટેશને આવવું.)

* * * * * * *

ગો.મા.ત્રિ અને સરસ્વતીચન્દ્ર

(Wednesday, 13 March 2013 at 11:45pm)

ડમડમબાબા ડાયલોગ સિરીઝ.....“પ્રભુ...પ્રભુ...મને પૃથ્વીલોક પર પાછો મોકલી આપો. મારો સમય થઈ ગયો છે.”...“વત્સ...પૃથ્વીલોક પર પરત ફરીને ત્યાં તું કરીશ શું? કોઈ કામ નક્કી કરી રાખ્યું છે?”...“હા...હું ત્યાં જઇને ટી.વી. સિરિઅલ ‘સરસ્વતીચન્દ્ર’ પરથી નવેસરથી નવલકથા લખવા માંગુ છું.”...“ઓ.કે. વત્સ. હું તને પૃથ્વીલોક પર પાછો મોકલવાનો ઑર્ડર આજે જ કરી દઉં છું. અહીંના ચોપડે તારું નામ શું છે?”...“ગોવર્ધનરામ માધવરામ ત્રિપાઠી.”

* * * * * * *

(Thursday, 14 March 2013 at 04:45pm)

ડમડમબાબાનું ચોંકાવનારું સંશોધન.....અમદાવાદમાં મેટ્રો રેલ પ્રોજેક્ટનું ખાતમૂહુર્ત થઈ ગયું છે.....સાબરમતી જેલમાં સુરંગ ખોદીને.....

* * * * * * *

(Friday, 15 March 2013 at 04:00pm)

ડમડમબાબાનું ચોંકાવનારું સંશોધન અને ડાયલોગ સિરીઝ.....“ગોવર્ઘનરામ માધવરામ ત્રિપાઠી દ્વારા ગુજરાતી ભાષામાં લખાયેલી નવલકથા ‘સરસ્વતીચન્દ્ર’ પરથી ટી.વી. સિરિઅલ બનાવનાર સંજય લીલા ભણસાલીને મૂળ નવલકથા વાંચી ચૂકેલા વાચકો સંભળાવી રહ્યા છે.....”...“શું? વખાણ?.....”...“ના. સરસ્વતી.”

* * * * * * *

ભારતના રાષ્ટ્રપતિ પ્રણવ મુખરજી

(Saturday, 16 March 2013 at 01:00pm)

ડમડમબાબાનું ચોંકાવનારું સંશોધન.....ખાસ કંઈ નથી. આજે 2013ની 16મી માર્ચ છે. ગયે વર્ષે આજના દિવસે કેન્દ્રિય અંદાજપત્ર રજૂ કરનાર નાણાં પ્રધાન પ્રણવ મુખરજી આજે રાષ્ટ્રપતિ ભવનમાં બેસી સંસદનું બજેટ સત્ર જોઈ રહ્યા છે.

* * * * * * *

ઇટાલીનું 'દહેજ' : બે નૌસૈનિકો

(Sunday, 17 March 2013 at 04:44pm)

ડમડમબાબા ઓલ્ડ ‘ન્યૂ’ઝ સર્વિસ.....જાણવા મળ્યા મુજબ ઇટાલી સરકાર ભારત સરકાર સામે ‘દહેજ પ્રતિબંધક ધારા’ હેઠળ કોર્ટ કાર્યવાહી કરવાનું વિચારી રહી છે.....એવું કારણ આપીને કે ‘કન્યાવિદાય’ના આટલા વર્ષો પસાર થયા પછી ‘દહેજ’માં ‘બે સૈનિકો’ની માગણી કરો છો.

* * * * * * *

ચિત્રલેખા અને આસારામની જુગત જોડી

(Thursday, 21 March 2013 at 07:55pm)

ડમડમબાબા ઓલ્ડ ‘ન્યૂ’ઝ સર્વિસ અને ચોંકાવનારું સંશોધન.....દુકાળની પરિસ્થિતિ વેઠી રહેલા મહારાષ્ટ્રમાં ધુળેટીનો તહેવાર ધામધૂમથી ઉજવીને મહામૂલા પાણીના વેડફાટમાં વધારો કરતી આસારામની ઉજવણીનો અહેવાલ લેવા જનારા પત્રકારો ભક્તોનો માર ખાઈ રહ્યા છે અને આ તાયફાની રાજ્યમાં ચોમેર ટીકા થઈ રહી છે......જો કે તેમાં ય એક અપવાદ છે ખરો હોં......સદા અગ્રસર સાપ્તાહિક ‘ચિત્રલેખા’એ આસારામની આરતી ઉતારતી કવરસ્ટોરી અને તેની એક્સક્લુઝિવ મુલાકાત પ્રકટ કરી છે.

* * * * * * *

માર્કન્ડેય કાત્જુ અને સંજય દત્ત : જુગત જોડી

(Friday, 22 March 2013 at 05:30pm)

ડમડમબાબા ઓલ્ડ ‘ન્યૂ’ઝ સર્વિસ અને ચોંકાવનારું સંશોધન.....પ્રેસ કાઉન્સિલ ઑફ ઇન્ડિયાના અધ્યક્ષ જસ્ટિસ માર્કન્ડેય કાત્જુએ સંજય દત્તને માફી આપવાની વકીલાત કરતા હવે માત્ર આટલી જ જાહેરાત કરવાની બાકી રહે છે.....“મને મહારાષ્ટ્રનો રાજ્યપાલ બનાવી દો.”

* * * * * * *

(Saturday, 23 March 2013 at 06:20pm)

ડમડમબાબા ડાયલોગ સિરીઝ....."એક સ્માર્ટફોન સિરીઝનો મોબાઇલ આપજો.....અને હા...બિલ જરા ઝડપથી બનાવજો."..."શું ઉતાવળ છે સાહેબ...પહેલા પીસ જોઈ – તપાસી તો લો..."..."ના...ના...બિલ ઝડપથી જ બનાવજો યાર...નવું મોડેલ એથીય ઝડપથી બજારમાં આવી જાય છે."

* * * * * * *

(Saturday, 23 March 2013 at 06:45pm)

ડમડમબાબાનું ચોંકાવનારું સંશોધન.....ન્યાયાધીશના પદ સુધી પહોંચતા પહેલા વ્યક્તિ કારકિર્દીના કોઈ પણ તબક્કે વકીલાતના વ્યવસાયમાં કાર્યરત હોય એવું સામાન્યપણે જોવામાં આવે છે.....જસ્ટિસ માર્કન્ડેય કાત્જુએ નિવૃત્તિ પછી પણ એ વ્યવસાય ચાલુ રાખ્યો.....સંજય દત્તની વગર ફીની વકીલાત કરવા.....

* * * * * * *

(Monday, 25 March 2013 at 03:20pm)

ડમડમબાબાનું ચોંકાવનારું સંશોધન અને સલાહ.....માર્ચ મહિનો પૂરો થવામાં હોય અને છાપામાં જાહેરાતો શરૂ થઈ જાય છે.....'ગ્રેજ્યુએટ થયા પછી શું કરશો? કારકિર્દી વિષયક સલાહ માટે અમને ફલાણી – ઢીંકણી જગ્યાએ મળો, ફોન કરો'...વગેરે...અલ્યા ભાઈ ગ્રેજ્યુએટ થયા પછી કરવાનું શું હોય?...એમ્પ્લોયમેન્ટ એક્સચેન્જ (ગુજરાતમાં અને ગુજરાતીમાં 'રોજગાર વિનિમય કચેરી')માં જઈને નામ નોંધાવવાનું.....અને નોકરી મળી જાય પછી મેરેજ બ્યુરોમાં જઈને નામ નોંધાવવાનું.....જો કોલેજના ત્રણ વર્ષ દરમિયાન ઠેકાણું ન પડ્યું હોય તો.....

* * * * * * *

(Tuesday, 26 March 2013 at 03:45pm)

ધૂળેટીની પૂર્વસંધ્યાએ ડમડમબાબાની વિશેષ જાહેરાત.....મિત્રો – પરિચિતો – સગાં-સંબંધીઓ આવતીકાલે આપનું હદ બહારનું 'કલરકામ' કરી મૂકે એવી શક્યતાઓ હોય તો.....તો શરીરને પૂર્વવત સ્થિતિમાં લાવવા માટે અમારા 'ડ્રાય ક્લીન પેકેજ'નો લાભ લેવા વિનંતી. ધૂળેટી પ્રેમી નાગરિકોની સેવામાં – ડમડમબાબા ડ્રાય ક્લીન કેન્દ્ર

* * * * * * *

(Wednesday, 27 March 2013 at 11:50pm)

डमडमबाबा फ्रेस फिल्मी डायलोग.....

कुत्ते कमीने मैं तुम्हारा खून पी जाउंगा...

...अगर मेरे खून से क्रोस मेच हुआ तो...

* * * * * * *

(Friday, 29 March 2013 at 01:45pm)

डमडमबाबा फ्रेस फिल्मी डायलोग.....

मैं तुम्हारे बच्चे की माँ बनने वाली हूं...

...अगर डीएनए जांच का परिणाम पॉझिटिव आया तो...

* * * * * * *

(Saturday, 30 March 2013 at 07:30pm)

डमडमबाबा फ्रेस फिल्मी डायलोग.....

शेठजी मैंने आपका नमक खाया है...

...क्योंकि रसोई-घर की अलमारीमें खाने की सिर्फ वही चीज बची थी...

ગયા મહિને અહીં મુકેલી ફેબ્રુઆરી – 2013ના પ્રોફાઇલ સ્ટેટસની પોસ્ટ લીંક આ રહી – http://www.binitmodi.blogspot.in/2013/03/2013.html

(* નિશાની વાળી તસવીર : બિનીત મોદી, એ સિવાયની સંબંધિત તસવીરો અને ઇમિજસ : નેટ પરથી)