ફેસબુક : ફન, ફંડાઝ અને ફેક્ટ્સ (ડિસેમ્બર – 2015)

(ડિસેમ્બર – 2015)

સોશિયલ નેટવર્કિંગ સાઇટ પર જે કંઈ લખાય તેના અસ્તિત્વનું માપ સેકન્ડ – મિનિટોથી શરૂ કરીને થોડા કલાકો સુધી લંબાવી શકાય. પછી?...પછી એને ભૂલી જવાનું. આદર્શ વસ્તુસ્થિતિ એને ભૂલી જવામાં જ છે. પરંતુ અહીં બ્લોગની દિવાલ પર તેને કોપી-પેસ્ટ કરવા પાછળના બે આશય છે.

એક તે એનું અસ્તિત્વ થોડા મહિના-માસ લંબાવવાનું અને બીજો તે જેઓ સોશિયલ નેટવર્કિંગ જગતમાં દાખલ નથી થયા અથવા દાખલ થયા પછી દૂર થયા છે તેમના સુધી પહોંચવાનો.

આ રીતે દર મહિને Control ‘A’ – Control ‘C’ – Control ‘V’ની મદદથી રજૂ થવાના વિચારને 2012માં અમલમાં મૂક્યા પછી તેને નિયમિત કરતાં એ ક્રમમાં આ 62મી પોસ્ટ છે.

2010ના વર્ષની એક અને 2011, 2012, 2013 અને 2014ના વર્ષની મહિનાવાર સ્ટેટસ પ્રોફાઇલ પોસ્ટ રજૂ કર્યા પછી પ્રસ્તુત છે હવે ડિસેમ્બર – 2015. જે તે દિવસના વાર, તારીખ અને સમયના ઉલ્લેખ નીચે એ દિવસનું ‘સ્ટેટસ અપડેટ’ છે. ‘ફેસબુક’ / FACEBOOK પર આવા દરેક સ્ટેટસ અપડેટ સાથે મારું નામ અને કૌંસમાં ગામનું નામ ‘અમદાવાદ’ / Ahmedabad એમ લખતો હોઉં છું પરંતુ અહીં એમ કરવું જરૂરી નથી લાગતું. હા, ડમડમબાબા એ બ્લોગલેખકના અસ્તિત્વનો જ એક ભાગ છે.

આભાર.

(Wednesday, 2 December 2015 at 02:22pm)

ગુજરાતની સ્થાનિક સ્વરાજ્યની ચૂંટણીઓના પરિણામોને ‘સહિષ્ણુ’ બનીને સ્વીકારી ‘ઘરવાપસી’ કરવી એ એક જ માર્ગ બચ્યો છે.

લિ. ભાજપનો ‘મીસકોલ’ કાર્યકર

* * * * * * *

પંડિત દીનદયાળ ઉપાધ્યાય

(Thursday, 3 December 2015 at 02:55pm)

ભાજપના પૂર્વાશ્રમ એવા જનસંઘના ઉમેદવારોએ પિસ્તાલીસ વર્ષ અગાઉ ચૂંટણી દ્વારા બહુમતીથી બોટાદ નગરપાલિકામાં સત્તાના સૂત્રો સંભાળ્યા ત્યારે પંડિત દીનદયાળ ઉપાધ્યાય મતદાર નાગરિકોનું અભિવાદન કરવા અને પક્ષના કાર્યકરોને બૌધ્ધિક આપવા ભાવનગર જિલ્લાના બોટાદ ગામની મુલાકાતે આવ્યા હતા.

આજે હવે જિલ્લો બની ગયેલા બોટાદની મુલાકાતે ભાજપી કુળના કોઈ નેતા આવે તેમ નથી...કેમ કે...

...બોટાદ નગરપાલિકાની સત્તા જળવાઈ રહી છે પરંતુ જિલ્લા પંચાયત સહિત ગઢડા, બરવાળા, રાણપુર અને બોટાદ તાલુકા પંચાયતમાંથી ભારતીય જનતા પક્ષનો સફાયો થઈ ગયો છે.

* * * * * * *

(Wednesday, 9 December 2015 at 07:40pm)

જાડિયા – પાડિયા લોકો ગાડીમાં બેસવાનું કે તેને હંકારવાનું ચાલુ રાખશે ત્યાં સુધી...

...કાર વ્હીલ બૅલન્સિંગ કે વ્હીલ અલાઇનમન્ટના ધંધાને ઊની આંચ આવવાની નથી.

* * * * * * *

વિસ્મય શાહ : અમદાવાદનો અકસ્માતવાળો

(Friday, 11 December 2015 at 07:20pm)

જીવલેણ અકસ્માત સર્જવાના કૉર્ટ કેસમાં નિર્દોષ છૂટેલા સલમાન ખાનના સમાચારનું મને સહેજે આશ્ચર્ય કે વિસ્મય થતું નથી.

લિ. વિસ્મય શાહ (અમદાવાદ ‘હીટ એન્ડ રન’ કેસનો અન્ડર ટ્રાયલ આરોપી)

* * * * * * *

પંકજ જાડેજાની કાર અને ભાવનગરથી આવતો ‘કાતિલ’

(Tuesday, 15 December 2015 at 08:00pm)

શક્તિસિંહ ગોહિલ પહેલીવાર 1990માં ભાવનગરના કોંગ્રેસી ધારાસભ્ય તરીકે ચૂંટાઈ આવ્યા ત્યારે તેમણે તત્કાલીન મુખ્યમંત્રી ચીમનભાઈ પટેલની સરકાર સમક્ષ અમદાવાદ – ભાવનગર રોડને ‘બે માર્ગી’ કરવાની માગણી – દરખાસ્ત વિધાનસભામાં કરી હતી.

પચીસ વર્ષના વહાણા વીતી ગયા પછી 2015ના અંત ભાગમાં લગ્નપ્રસંગે ભાવનગર જઈ રહેલા અમદાવાદના ડેપ્યુટી કલેક્ટર પંકજ જાડેજા સહિતના ‘ચાર’ વ્યક્તિના પરિવારનો માર્ગ અકસ્માતમાં અંત આવી ગયો તોય રસ્તો ‘બે’ માર્ગી ન થયો તે ન થયો.

* * * * * * *

(Thursday, 17 December 2015 at 00:20am)

પરિકમ્મા – પરિભ્રમણ કરીને દૂબળો – પાતળો રહેતો સાધુ વ્યાસપીઠ પર બેસીને કથા – કિર્તન કરતો થાય એટલે જાડિયો-પાડિયો થઈ જાય છે.

* * * * * * *

(Saturday, 19 December 2015 at 00:34am)

કચ્છ – ધોરડો ટેન્ટ સિટી ખાતે આયોજિત ડીજીપી કૉન્ફરન્સમાં પાસ થયેલો ‘પોલીસના વસિયતનામા’નો ઠરાવ

અવસાન સમયે કે બેસણામાં જે સ્વજનો – મિત્રો રડે તેને સાંત્વના આપી છાના કરવા...અને...

...જે સ્વજનો – મિત્રો ના રડે તેમના માટે ટીઅર ગૅસના શેલ ફોડવા.

* * * * * * *

(Monday, 21 December 2015 at 12:34pm)

ખોટા-અન્યાયી પોસ્ટ પેઇડ મોબાઇલ બિલ સામે ત્રીજા વિશ્વયુદ્ધ કક્ષાની લડત આપી શહીદ થવામાંથી બચી ગયેલા લોકો ચોથું વિશ્વયુદ્ધ મફત વાઇ-ફાઇના પાસવર્ડ માટે કરશે.

* * * * * * *

(Monday, 21 December 2015 at 07:30pm)

કેન્દ્રિય નાણામંત્રી અરૂણ જેટલી અને ગુજરાતના નાણામંત્રી સૌરભ પટેલ બજેટની રજૂઆત કરી લે એ દિવસ સુધી કેલક્યુલેટરમાં ભાગાકારનું બટન / Divided By વાપરવા પર પ્રતિબંધ.

હુકમથી, શિવાનંદ ઝા પોલીસ કમિશનર – અમદાવાદ શહેર

(સંદર્ભ : ઉત્તરાયણના દિવસે સવાર – સાંજ બે-બે કલાક પતંગ નહીં ચગાવવાનું જાહેરનામું)

* * * * * * *

(Wednesday, 23 December 2015 at 05:30pm)

લિફ્ટમાં ચોંટાડેલા દેવ-દેવીઓના ફોટાના આધારે જો દરજ્જો આપવામાં આવે તો ભારતમાં મંદિરોની સંખ્યામાં ઉછાળો આવે એમ છે.

* * * * * * *

(Thursday, 24 December 2015 at 12:12pm)

અંગત કે ઘરવપરાશની કોઈ ચીજ-વસ્તુ ખરીદીને દુકાનદાર પાસે ઝભલું કે પૉલિથીન બૅગ માંગો તો ધરાર ન મળે...

પણ એ જ વસ્તુની જો ઑન લાઇન ખરીદી કરીએ તો કંપની ટ્રિપલ લેઅર પેકિંગ કરીને ઘર સુધી મોકલી આપે.

(જાગો ‘ઘરાક’ જાગો : 24 ડિસેમ્બર, રાષ્ટ્રીય ગ્રાહક અધિકાર દિવસ)

* * * * * * *

(નાતાલ : Friday, 25 December 2015 at 08:45am)

ભારતીય જનતા પક્ષ એકમાત્ર રાજકીય પક્ષ છે જે ઉંમરમાં પંચોતેર પાર કરી ગયેલા તેના સભ્યોને ‘સાન્તાક્લોઝ’નો દરજ્જો આપે છે.

જેમ કે – અટલ બિહારી વાજપેયી, લાલ કૃષ્ણ અડવાણી, જસવંત સિંહ, મુરલી મનોહર જોશી, શાંતા કુમાર અને Our Own કેશુભાઈ પટેલ

* * * * * * *

(Saturday, 26 December 2015 at 05:30am)

પડોશીને ત્યાં લગ્નપ્રસંગે પઠાણીને બદલે અન્ય વસ્ત્રો પહેરીને જવાથી બહુ વટ પડતો નથી.

-     મન્ટો

નોંધ : મન્ટોએ આવું કંઈ કહ્યું નથી. કહે પણ નહીં. આ તો એમના નામે ઠપકારીએ તો આપણો જરા વટ પડે.

નોંધની નોંધ : ભારતના NRI વડાપ્રધાન નરેન્દ્ર મોદીની પાકિસ્તાનની ટૂંકી મુલાકાત અને પાકિસ્તાનના વડાપ્રધાન નવાઝ શરીફના પૌત્રના લગ્નની ઘટનાને ઉપરોક્ત લખાણ સાથે કોઈ નિસબત નથી.

* * * * * * *

(Thursday, 31 December 2015 at 05:45pm)

આજે વર્ષ 2015નો છેલ્લો દિવસ છે અને ગુજરાતી ફિલ્મ ‘છેલ્લો દિવસ’ સિનેમાના સંસ્કારની દ્રષ્ટિએ ‘છેલ્લા પાટલે’ બેઠેલી ફિલ્મ છે.

ગયા મહિને અહીં મુકેલી નવેમ્બર – 2015ના પ્રોફાઇલ સ્ટેટસની પોસ્ટ લિંક આ રહી –

http://www.binitmodi.blogspot.in/2015/12/2015.html

..... તેમજ ગત વર્ષોમાં અહીં મુકેલી ડિસેમ્બર – 2011, ડિસેમ્બર – 2012, ડિસેમ્બર – 2013 તેમજ ડિસેમ્બર – 2014ના પ્રોફાઇલ સ્ટેટસની પોસ્ટ લિંક અનુક્રમે આ રહી –

http://www.binitmodi.blogspot.in/2013/01/2011.html

http://www.binitmodi.blogspot.in/2013/01/2012.html

http://www.binitmodi.blogspot.in/2014/01/2013.html

http://www.binitmodi.blogspot.in/2015/01/2014.html

(સંબંધિત તસવીરો અને ઇમિજસ : નેટ પરથી)

ફેસબુક : ફન, ફંડાઝ અને ફેક્ટ્સ (નવેમ્બર – 2015)

(નવેમ્બર – 2015)

સોશિયલ નેટવર્કિંગ સાઇટ પર જે કંઈ લખાય તેના અસ્તિત્વનું માપ સેકન્ડ – મિનિટોથી શરૂ કરીને થોડા કલાકો સુધી લંબાવી શકાય. પછી?...પછી એને ભૂલી જવાનું. આદર્શ વસ્તુસ્થિતિ એને ભૂલી જવામાં જ છે. પરંતુ અહીં બ્લોગની દિવાલ પર તેને કોપી-પેસ્ટ કરવા પાછળના બે આશય છે.

એક તે એનું અસ્તિત્વ થોડા મહિના-માસ લંબાવવાનું અને બીજો તે જેઓ સોશિયલ નેટવર્કિંગ જગતમાં દાખલ નથી થયા અથવા દાખલ થયા પછી દૂર થયા છે તેમના સુધી પહોંચવાનો.

આ રીતે દર મહિને Control ‘A’ – Control ‘C’ – Control ‘V’ની મદદથી રજૂ થવાના વિચારને 2012માં અમલમાં મૂક્યા પછી તેને નિયમિત કરતાં એ ક્રમમાં આ 61મી પોસ્ટ છે.

2010ના વર્ષની એક અને 2011, 2012, 2013 અને 2014ના વર્ષની મહિનાવાર સ્ટેટસ પ્રોફાઇલ પોસ્ટ રજૂ કર્યા પછી પ્રસ્તુત છે હવે નવેમ્બર – 2015. જે તે દિવસના વાર, તારીખ અને સમયના ઉલ્લેખ નીચે એ દિવસનું ‘સ્ટેટસ અપડેટ’ છે. ‘ફેસબુક’ / FACEBOOK પર આવા દરેક સ્ટેટસ અપડેટ સાથે મારું નામ અને કૌંસમાં ગામનું નામ ‘અમદાવાદ’ / Ahmedabad એમ લખતો હોઉં છું પરંતુ અહીં એમ કરવું જરૂરી નથી લાગતું. હા, ડમડમબાબા એ બ્લોગલેખકના અસ્તિત્વનો જ એક ભાગ છે.

આભાર.

(Monday, 2 November 2015 at 06:50pm)

“ડાર્લિંગ...સવારે જરા વહેલો ઉઠાડજે ને...છાપાવાળો આવે એ પહેલાં...તેની પાસે જલસોનો દિવાળી અંક ઑર્ડર કરવાનો છે.”

“શ્યોર બકા...બાય ધ વે...ડાર્લિંગનું ગુજરાતી શું થાય?”

“આ તું બોલી એ...‘બકા’...યુ આર જીનિઅસ...”

“તો પછી આવતીકાલે માળિયું સાફ કરવાનું પાકું સમજું છું...વહેલો ઉઠવાનો છે તો થોડું દિવાળીનું કામ કરી લઇએ.”

* * * * * * *

(Tuesday, 3 November 2015 at 05:55pm)

મીસકોલથી સભ્યપદ પામેલો ભાજપનો કાર્યકર ઇ-મેલ, એસએમએસ અને વોટ્સએપ કરવા છતાં પક્ષની મિટિંગમાં ફરકતો નથી.

* * * * * * *

(Friday, 6 November 2015 at 06:45pm)

સામી દિવાળીએ લગ્નપ્રસંગોનું પ્રમાણ નહિવત્ હોય છે...પરંતુ...

...છોટા રાજનના સ્વદેશાગમનને કારણે ભારતમાં આજે ‘સરકારી’ જમાઈઓની કુલ સંખ્યામાં એકનો વધારો થયો છે.

* * * * * * *

(ધનતેરસ : Monday, 9 November 2015 at 05:35pm)

ચૂંટણી ઢંઢેરાના ભાજપી વાયદા પ્રમાણે બૅન્ક ખાતામાં રૂપિયા પંદર – પંદર લાખ જમા થઈ ગયા હોત તો...

ભારતમાં ધનતેરસની સામૂહિક પૂજા થતી હોત.

* * * * * * *

(Monday, 16 November 2015 at 02:25pm)

‘Love Gem Wealth Foundation’...

...કંઈ નહીં...‘પ્રેમ રતન ધન પાયો’નું અંગ્રેજી કરીને ફિલમની નવેસરથી ફિલમ ઉતારી છે.

* * * * * * *

OROP આંદોલન

(Wednesday, 18 November 2015 at 04:00pm)

‘સો વરસનો થાજે દીકરા’ના આશિર્વાદ પામેલો બાળક...કિશોર વય પાર કરતા અને યુવાનીમાં ડગ માંડતા જ...જો...ભારતીય લશ્કરમાં સામેલ થઈ પચાસની આસપાસ સેવા નિવૃત્ત થાય તો...

OROP વન રૅન્ક વન પેન્શન / One Rank One Pensionની આજકાલની ફૉર્મ્યૂલા હેઠળ પંચાણુમે વર્ષે તેને...રૂપિયા 68,21,937=76 પૈસાનું માસિક પેન્શન મળવાપાત્ર ઠરે.

* * * * * * *

(Saturday, 21 November 2015 at 02:12pm)

પંચાયતથી પાર્લમન્ટના ચૂંટણી મતદાન અગાઉ ‘બુલેટનો જવાબ બૅલટથી આપવામાં આવશે’...એવું વાંચવામાં આવે ત્યારે સમજવામાં બવ તકલીફ પડે છે કે...

...આ બુલેટ મોટરસાઇકલની વાત થાય છે કે અસલી બુલિટની.

* * * * * * *

ટ્વિન્કલ ખન્ના અને ક્વિન્ટલ

(Tuesday, 24 November 2015 at 12:12pm)

યાદશક્તિ કેળવો શ્રેણી...(1)

વજનના એકમ તરીકે ‘ક્વિન્ટલ’ શબ્દ યાદ ન રહેતો હોય તો વિકલ્પે...સ્વર્ગસ્થ અભિનેતા રાજેશ ખન્ના – અભિનેત્રી ડિમ્પલ કાપડિયાની દીકરી અને અભિનેતા અક્ષયકુમારની અભિનેત્રી પત્ની ‘ટ્વિન્કલ’ ખન્નાનું નામ યાદ રાખવાનો પ્રયત્ન કરો. સફળતા મળશે જ.

* * * * * * *

બ્રાન્ડ અૅમ્બૅસેડરને બૅન્ડ બજા દિયા

(Wednesday, 25 November 2015 at 12:40pm)

પાડાના વાંકે પ‘ખાલી’ને ડામ (જૂની કહેવત)

અસહિષ્ણુતાના વાંકે ખીસું ‘ખાલી’ કરનાર સ્નૅપ ડીલને ડામ (નવી કહેવત)

* * * * * * *

પ્રણવ મુખરજી અને પાઇપ

(Monday, 30 November 2015 at 03:20pm)

અવૉર્ડ વિતરણ અને વિદ્યાર્થીઓ સાથે વાતચીત કરવા આજે IIM – Ahmedabadની મુલાકાતે આવતા રાષ્ટ્રપતિ પ્રણવ મુખરજીના સંસ્થા પ્રવેશ અગાઉ રેસીડન્સીના ઓટલે બેસીને સ્મોકિંગ સાથે ટોળ-ટપ્પા કરતા વિદ્યાર્થીઓને ફરજ પરની પોલીસે ટપાર્યા...એટલે...

...તેમાંના એકે પોલીસને સુણાવી દેવાની ભાષામાં જ કહ્યું...

“અમારી આટલી સ્વતંત્રતા તો કાયમ રાખો. રાષ્ટ્રપતિ પોતે પણ દેશના નાણામંત્રી હતા ત્યારે બજેટ બનાવતી વખતે સાઉથ બ્લૉકમાં લિજ્જતથી પાઇપ પીતા હતા.”

ગયા મહિને અહીં મુકેલી ઑક્ટોબર – 2015ના પ્રોફાઇલ સ્ટેટસની પોસ્ટ લિંક આ રહી –

http://www.binitmodi.blogspot.in/2015/11/2015.html

..... તેમજ ગત વર્ષોમાં અહીં મુકેલી નવેમ્બર – 2011, નવેમ્બર – 2012, નવેમ્બર – 2013 તેમજ નવેમ્બર – 2014ના પ્રોફાઇલ સ્ટેટસની પોસ્ટ લિંક અનુક્રમે આ રહી –

http://www.binitmodi.blogspot.in/2012/12/2011.html

http://www.binitmodi.blogspot.in/2012/12/2012.html

http://www.binitmodi.blogspot.in/2013/12/2013.html

http://www.binitmodi.blogspot.in/2014/12/2014.html

(સંબંધિત તસવીરો અને ઇમિજસ : નેટ પરથી)