ફેસબુક : ફન, ફંડાઝ અને ફેક્ટ્સ (મે – 2012)

(મે – 2012)

સોશિયલ નેટવર્કિંગ સાઇટ પર જે કંઈ લખાય તેના અસ્તિત્વનું માપ સેકન્ડ – મિનિટોથી શરૂ કરીને થોડા કલાકો સુધી લંબાવી શકાય. પછી?...પછી એને ભૂલી જવાનું. આદર્શ વસ્તુસ્થિતિ એને ભૂલી જવામાં જ છે. પરંતુ અહીં બ્લોગની દિવાલ પર તેને કોપી-પેસ્ટ કરવા પાછળના આશય માત્ર બે જ છે.

એક તે એનું અસ્તિત્વ થોડા મહિના-માસ લંબાવવાનું અને બીજો તે જેઓ સોશિયલ નેટવર્કિંગ જગતમાં દાખલ નથી થયા તેમના સુધી પહોંચવાનો.

આ રીતે દર મહિને Control ‘A’ – Control ‘C’ – Control ‘V’ની મદદથી રજૂ થવાનો વિચાર છે. આનો અમલ કરવાની કોઈ નિશ્ચિત તારીખ નથી તેમ આ ક્યાં સુધી ચલાવવું તે ય નિશ્ચિત નથી. હા, પ્રતિભાવ – કમેન્ટસ્ એ નક્કી કરવામાં ચોક્કસ મદદરૂપ થશે.

એ રીતે મે – 2013ના સ્ટેટસ અપડેટ આ મહિનાના પ્રારંભે અહીં મુક્યા પછી હવે પ્રસ્તુત છે ગત વર્ષના આ સમયગાળાના પ્રોફાઇલ સ્ટેટસ. જે તે દિવસના વાર, તારીખ સમયના ઉલ્લેખ નીચે એ દિવસનું ‘સ્ટેટસ અપડેટ’ છે. ‘ફેસબુક’ / FACEBOOK પર આવા દરેક સ્ટેટસ અપડેટ સાથે મારું નામ અને કૌંસમાં ગામનું નામ ‘અમદાવાદ’ / Ahmedabad એમ લખતો હોઉં છું પરંતુ અહીં એમ કરવું જરૂરી નથી લાગતું.

આભાર.

(*) ફોટો કૉલાઝ

(Tuesday, 1 May 2012 at 11:35am)

આજે ત્રેપનમા ગુજરાત રાજ્ય સ્થાપના દિને રાજ્યના ઉદ્ઘાટન સમારંભમાં આશીર્વચન આપનાર પૂજ્ય રવિશંકર મહારાજના સ્મરણ સાથે નવલકથાકાર અશ્વિની ભટ્ટ પણ યાદ આવ્યા. શા માટે? 1980 પછીના દિવસોમાં તબિયત કથળતી ત્યારે વી.એસ. હોસ્પિટલમાં સારવાર માટે આવતા મહારાજ પ્રીતમનગર અખાડાના એક રૂમમાં રહેતા અને નજીકમાં રહેતા અશ્વિનીભાઈ મહારાજને નિયમિત મળવા જતા. અશ્વિનીભાઈ તેમની સાથે વાતો કરતા એવું કહેવાની જરૂર ખરી? શું કહેતા મહારાજ એમને? “તું હજારો માણસનું ભલું કરી શકીશ એ વાત ભૂલી જજે. એ શક્ય નથી. જીવનમાં કોઈ એક માણસને મદદરૂપ થઈ તેની જિંદગી સુધારજે. તેના આશીર્વાદ મળશે.” મહારાજ...આપને જાણીને આનંદ થશે કે અશ્વિની ભટ્ટ આપની સલાહને અનુસર્યા છે. સમાજના સાવ છેવાડાના કહેવાય એવા એક નહીં, ચાર – પાંચ યુવાનોને તેઓ મદદરૂપ થયા છે.

* * * * * * *

રવીન્દ્રનાથ ઠાકુર

(Wednesday, 2 May 2012 at 02:22pm)

ભારત સરકારના સાંસ્કૃતિક મંત્રાલયના ઉપક્રમે કવિવર રવીન્દ્રનાથ ઠાકુરની દોઢસોમી જન્મજયંતી આજથી છ દિવસ (બીજીથી સાતમી મે) ‘રવીન્દ્ર મહોત્સવ’ નામે અમદાવાદમાં ગુજરાતી સાહિત્ય પરિષદના આંગણે ઉજવાઈ રહી છે. આનંદ. ભારત સરકારને વખતોવખત હચમચાવી જાણનારા પશ્ચિમ બંગાળના મુખ્યમંત્રી મમતા બેનરજીને માલુમ થાય કે કાર્ટૂન જોવા, જોઈને ટીકા-ટિપ્પણી કર્યા પછી કાર્ટૂનિસ્ટની ધરપકડ કરાવવા જેવા કામોમાંથી સમય મળે તો શતાબ્દી વર્ષ પાર કરી ગયેલા ગુજરાતના કવિવર ઝવેરચંદ મેઘાણી અને ઉમાશંકર જોશીને કોલકાતા સહિતનું બંગાળ કોઈક રીતે સ્મરે એવું ગોઠવજો. ટાગોર અને શાંતિનિકેતન સાથે આ બન્ને ગુજરાતી કવિનો નાતો જોડાયેલો હતો એ આપની જાણ માટે.

* * * * * * *

(Thursday, 3 May 2012 at 09:09am)

ડમડમબાબાનું સંશોધન.....“દુનિયાનું કોઈ પણ કમ્પ્યુટર કે લેપટોપ વગર ભણે સાહિત્યમાં ડોક્ટરેટની ડીગ્રી ધરાવતું હોય છે.” વિશ્વાસ ના બેસતો હોય તો આપનું કમ્પ્યુટર કે લેપટોપ જાતે તપાસી લો. જુઓ, એમાં ડી. લિટ. ‘Delete’નું બટન છે કે નહીં?

* * * * * * *

ચેતન 'ભગત'નું ધાર્મિક સાહિત્ય

(Friday, 4 May 2012 at 03:15pm)

અમદાવાદમાં સાબરમતી રિવરફ્રન્ટ પર રાષ્ટ્રીય પુસ્તક મેળો શરૂ થયો એનો આનંદ. જો કે મારો એ આનંદ થોડી જ વારમાં વિલાઈ ગયો. થયું એવું કે.....એક બુક સ્ટોલ પર મેં ચેતન ભગતના પુસ્તકો વિશે પૂછપરછ કરી તો જવાબ મળ્યો કે ‘ભગત’ના પુસ્તકોની તપાસ પેલા સ્ટોલ પર કરી જુઓ. અમે તો ધાર્મિક સાહિત્ય રાખતા નથી.

* * * * * * *

(Saturday, 5 May 2012 at 03:00pm)

‘ચીકન’નું શર્ટ – સાડી કે ડ્રેસ પહેર્યા પછી ભૂખ્યા પેટે પણ સો ટકા શાકાહારી હોવાનો દાવો ક્યારેય ન કરવો. – ‘PETA’ ડમડમબાબા ઉર્ફે ડમડમબાબાના આસિસ્ટન્ટ (શાકાહારનો પ્રચાર કરતી આંતરરાષ્ટ્રીય સંસ્થા ‘PETA’ના નિયામક)

* * * * * * *

(Tuesday, 8 May 2012 at 04:30pm)

ડમડમબાબાનું રાજકીય રિસર્ચ.....રાજકીય સ્થિતિની રીતે ઉત્તર પ્રદેશ અને ફ્રાન્સ એક સરખા છે. બન્ને સ્થળે સમાજવાદી પાર્ટી સત્તામાં આવી ગઈ છે. ઉત્તર પ્રદેશમાં માર્ચમાં સત્તા મળી તો ફ્રાન્સમાં મે મહિનામાં સત્તા પ્રાપ્ત થઈ.

* * * * * * *

(Tuesday, 15 May 2012 at 07:25pm)

"ટી.વી. શો 'સત્યમેવ જયતે'ના શૂટિંગની તમામ તૈયારીઓ થઈ ગઈ છે?"....."હા સાહેબ. આમિર ખાન સાબના આવવાની જ રાહ જોવાય છે."....."શૂટિંગ પ્રોપર્ટી ચેક કરી લીધી? તમામ ચીજ – વસ્તુઓ આવી ગઈ?"....."હા સાહેબ. એક લિટર ગ્લિસરીન પણ મંગાવી લીધું છે."

* * * * * * *

(Wednesday, 16 May 2012 at 03:00pm)

"સૌથી વધુ થીગડાં ક્યાં જોવા મળે?"....."ગરીબ માણહના કપડાં પર બાપલીયા, બીજે ચ્યાં હોય?"....."ના ખોટ્ટું. સૌથી વધુ થીગડાં અમદાવાદના રસ્તાઓ પર જોવા મળશે. જાવ ચેક કરી લો." (સૌજન્ય: અમદાવાદ મ્યુનિસિપલ કોર્પોરેશન)

* * * * * * *

(Saturday, 19 May 2012 at 03:10pm)

ડમડમબાબાનું સંશોધન / છેલ્લા દસ દિવસ દરમિયાન આપણી આ મહાન ધરતી પર છાંયડાના ક્ષેત્રફળમાં વધારો થયો છે.....કારણ કે.....એર-ઇન્ડિયાના પાઇલટ હડતાલ પર હોવાથી ટર્મેક પર પાર્ક થયેલા પ્લેન છાંયડો પાથરીને આ ઉનાળામાં દેશની મહાન સેવા કરી રહ્યા છે.

* * * * * * *

ફિલિપ્સ - ક્રિકેટ અને માંદગી

(Monday, 21 May 2012 at 04:15pm)

ડમડમબાબાનું તબીબી સંશોધન ઉર્ફે ચોંકાવનારું મેડિકલ રિસર્ચ.....ક્રિકેટ મેચ કે આઈપીએલ જેવી ટૂર્નામેન્ટ જોવાના શોખીન હો અને સંજોગોવશાત ખુદની કે પારિવારિક માંદગી અંતર્ગત હોસ્પિટલાઇઝ્ડ થવાનો વખત આવે તો ‘ફિલિપ્સ’ના શો-રૂમમાં દાખલ થઈ જવાનું. સારવાર માટેના મેડિકલ ઇક્વિપ્મન્ટની સાથે-સાથે ટેલિવિઝન પણ બનાવતી હોય તેવી દુનિયાની તે એકમાત્ર કંપની છે.

* * * * * * *

(Monday, 21 May 2012 at 06:20pm)

શાહરૂખખાન : વાનખેડે સ્ટેડિયમની પ્રવેશબંધી પહેલા અને પછી.....

“પપ્પા, શુટીંગમાંથી વહેલા પરવારી જજો. અમારે ક્રિકેટ મેચ જોવા જવું છે. નાના છોકરાંવને વાલી વિના અંદર જવા નથી દેતા.”.....“બેટા, ટ્યુશનમાંથી વહેલા પરવારી શકાય તો મને ક્રિકેટ મેચ જોવા લઈ જજો. કહે છે કે હવે બાળકો વિના ગાર્ડિયનને સ્ટેડિયમમાં અંદર જવા નથી દેતા.”.....“હા, કેટલાક ગાર્ડિયન ક્રિકેટ મેચ જોતાં – જોતાં કુસ્તી કરવા માંડે અને ગાળાગાળી પર ઉતરી આવે છે એટલે હવે એ લોકોએ નિયમોમાં ફેરફાર કર્યા છે.”

* * * * * * *

(Monday, 21 May 2012 at 10:55pm)

રાજીવ ગાંધી.....20-08-1944થી 21-05-1991

એકવીસમી સદીમાં ઝડપભેર જવા માગતા હતા.....એ પહેલાં.....એકવીસમી મે ની રાત્રે વિદાય થયા.....આજે – આ સમયે વરસ થયા એકવીસ.....

* * * * * * *

(Wednesday, 23 May 2012 at 04:15pm)

“સિઝનમાં ભરવાના પ્રૂફરીડિંગ કરેલા સો કિલો ઘઉં મોકલાવી આપજોને, લો આ સરનામું.”

“પ્રૂફરીડિંગ કરેલા? એવા કોઈ ઘઉં આવતા નથી.”.....“આવે છે. પ્રેસમાં કામ કરતા અમારા બાજુવાળાએ મંગાવ્યાને.....વીણેલા...સાફ કરેલા ઘઉં.”

* * * * * * *

(Wednesday, 23 May 2012 at 07:00pm)

‘નેનો કારના રિપેરીંગ માટે બાજુમાં સાઇકલ પંક્ચરની દુકાને પૂછપરછ કરવી.’ – ગેરેજ બહાર લખેલી સૂચના.

* * * * * * *

(Thursday, 24 May 2012 at 00:10am)

બે દિવસ પહેલા સત્તાના આઠ વર્ષ પુરા કરનારી મનમોહન સિંહ સરકારે પેટ્રોલના ભાવવધારામાં પણ આઠનો 'સ્કોર' જાળવી રાખ્યો.

* * * * * * *

(Thursday, 24 May 2012 at 01:05am)

પેટ્રોલના ભાવવધારાની સાથોસાથ મોંઘાદાટ પાર્કિંગ ચાર્જ અને બેફામ ટોલ ટેક્ષ પણ આપણી ચિંતાનો વિષય હોવા જોઈએ. અમદાવાદમાં મણિનગર રેલવે સ્ટેશને વાંચેલા પાર્કિંગ ચાર્જ પ્રમાણે ટુ વ્હીલર માટે એક દિવસના 16 રૂપિયા લેખે મહિનાના 480 રૂપિયા થાય. ધોરણસરનું વાહન ચલાવતા હોઈએ તો એક મહિનાનો પેટ્રોલ ખર્ચ થાય – 1000 રૂપિયા. થર્ડ પાર્ટી વીમા માટે ઇન્સ્યુરન્સ કંપની સ્કુટરના એક વર્ષના પ્રીમિઅમ લેખે 600થી 800 રૂપિયા વસુલતી હોય છે. ટોલ ટેક્ષની રકમ તો ટાલ પાડી દે તેવી જ હોય છે. ટુ વ્હીલર માટે એ દરેક જગ્યાએ લાગુ પડતો નથી પરંતુ મોટરકાર માટે તેનો દર કિલોમીટરે રૂપિયો એવો બેસતો હોય છે.

* * * * * * *

(Thursday, 24 May 2012 at 01:20am)

પેટ્રોલ ખરીદવા માટે હવે છપ્પનની છાતી અને કરન્સી પણ છપ્પન વાળી જોઈશે.....છપ્પન રૂપિયા અપાવતો એક અમેરિકન ડોલર.....

* * * * * * *

(Thursday, 24 May 2012 at 01:35am)

કોંગ્રેસ પક્ષે પહેલીવાર 1977માં સત્તા ગુમાવી હતી....બીજી વાર 1989માં.....અને.....ત્રીજી વાર 1996માં.....લાગે છે હવે ચોથી વાર પેટ્રોલના '77 ભાવવધારાને કારણે જ સત્તા ગુમાવશે.....અને...ત્યાં સુધીમાં પેટ્રોલના ભાવ '89થી લઈને '96 સુધી પહોંચી ગયા હશે.

* * * * * * *

(Thursday, 24 May 2012 at 03:33pm)

કાશ, પેટ્રોલ પણ ચાઇના મેડ ખરીદીને વાપરી શકાતું હોત.....

* * * * * * *

(Thursday, 24 May 2012 at 04:00pm)

ગઈકાલ સુધી પેટ્રોલના ભાવ સાથે મારું ખુદનું સંધાન કંઈક આવું હતું.....જન્મ વર્ષ :1970, પેટ્રોલનો ભાવ : લિટરે રૂપિયા 70/-.....

આજે પેટ્રોલના ભાવ સાથે મારું ખુદનું સંધાન કંઈક આવું છે.....ઘરમાં પહેલીવાર વાહન (સુવેગા મોપેડ) વસાવ્યું અને પેટ્રોલનો ભાવ સાંભળ્યાનું વર્ષ :1978, પેટ્રોલનો ભાવ : લિટરે રૂપિયા 78/-.....

ભાવવધારાએ કેટલો મોટો હનુમાન કુદકો લગાવ્યો છે તેનું એક ઉદાહરણ માત્ર.....

* * * * * * *

(Thursday, 24 May 2012 at 07:50pm)

ડમડમબાબાનું સેન્સેશનલ સંશોધન.....દુનિયામાં સૌથી સસ્તી જમીન ચીનમાં વેચાય છે કારણ કે પોતાની જેટલી જમીન વેચાય એનાથી ડબલ એ ભારતની જમીન હડપ કરી લે છે. આમ જમીનના ભાવ ટકી રહે છે અને સરવાળે પ્રજાને સસ્તી જમીન ઉપલબ્ધ થાય છે.

* * * * * * *

અમદાવાદનું ડ્રાઇવ-ઇન સિનેમા

(Saturday, 26 May 2012 at 05:00pm)

"ડ્રાઇવ-ઇનમાં પિક્ચર જોવાનું મોંઘું થયું."....."કેમ? એ લોકોએ ટિકિટના ભાવ વધાર્યા?"....."ના. પેટ્રોલ મોંઘું થયું."

* * * * * * *

(Saturday, 26 May 2012 at 05:05pm)

ડમડમબાબાનું આર્થિક ક્ષેત્રે આંતરરાષ્ટ્રીય સંશોધન

એક રૂપિયાની કોઈ કિંમત નથી રહી તેમ એક ડોલરની પણ કોઈ વેલ્યુ રહી નથી. લિટર પેટ્રોલ પણ ના આવે એ ડોલરને કરવાનો શું?

* * * * * * *

(Saturday, 26 May 2012 at 05:10pm)

"દેખો, ક્લાઇમેક્શ સીન મેં તુમ્હારા હીરો સે ફાઇટ હૈ. ઉસસે પહેલે પોલીસ કે સાથ તુમ્હારા તીન મિનિટ કા ચેઝ સિક્વન્સ ઔર તુમ સરન્ડર હોતા હૈ."

"ક્યા સાબ. બીસ સાલ સે અપન ફિલ્મો મે વિલનગીરી કરતા હૈ. થોડા સીનિઑરિટી કા લિહાજ કર કે પાંચ મિનટ કા તો ચેઝ રખ્ખો."

"મોન્ટીબાબા, પાંચ નહિ પંદરા મિનટ કા ચેઝ રખતા. મુઝે ક્યા ફર્ક પડતા હૈ? મગર પ્રોડ્યુસર ના બોલતા હૈ. કહેતા હૈ પેટ્રોલ મહેંગા હો ગયા હૈ, માલુમ નહિ ક્યા?"

* * * * * * *

(Monday, 28 May 2012 at 08:15pm)

આદરણીય જવાહરલાલ નેહરૂ, અઠવાડિયા અગાઉ રાજીવ ગાંધીની પૂણ્યતિથિએ (21મી મે) અમે તેમને યાદ કરતા આખા – અડધા પાનાની ઢગલો જાહેરાતો છપાવી એટલે ગઈકાલે આપની પૂણ્યતિથિએ (27મી મે) તમને યાદ કરવા માટે એક સાદી ટચૂકડી જાહેરાત પણ અમે છપાવી શક્યા નહીં, ફંડ ખલાસ થઈ ગયું હતું. સાથે એ બાબતની ખાતરી રાખશો કે આવતા મે સુધીમાં ટુG જેવો કોઈ મેળ પડી ગયો તો તમારા નામની સ્પેશિયલ પૂર્તિ કાઢશું. નેહરૂચાચા, અમને માફ કરશો. લિ. (કોં)ગ્રેસી સિંઘ

નોંધ: આ સ્ટેટસ મોડું લખવા માટે ડમડમબાબાને પણ માફ કરશો.

* * * * * * *

(Monday, 28 May 2012 at 08:30pm)

“મમ્મી, મારે લેટ નાઇટ શોમાં ફિલ્મ જોવા જવું છે. તેં હજી ખાવાનું નથી બનાવ્યું. જલદી કર, સખત ભૂખ લાગી છે.”

“બેટા, મેં બપોરે જ સાંજે જમવામાં દાળઢોકળી બનાવવાનું ફેસબુક સ્ટેટસ તારી વોલ પર મુક્યું હતું. અડધો કલાક રાહ જોઈ તોય તારું LIKE ના આવ્યું. પછી કેવી રીતે બનાવું. બોલી નાખ બકા, શું ખાવું છે.”

* * * * * * *

(Tuesday, 29 May 2012 at 07:40pm)

“સવારે ઉઠીને પહેલું શું કરવાનું?”.....“હાથ-મોં ધોઈ દાતણ-પાણી કરીને ચા-નાસ્તો કરવાનો.”

.....“ના. એથી ય પહેલાં...”

“બારણે છાપું આવીને પડ્યું હોય એ ટેબલ પર મુકવાનું.”.....“ના. એથી ય પહેલાં...”

“ઉનાળો હોય તો રૂમનો પંખો કે એરકંડિશનર બંધ કરવાનું.”.....“ના. એથી ય પહેલાં...”

“ભગવાનના ફોટાને પગે લાગવાનું.”.....“ના. એથી ય પહેલાં...”

.....“ફેસબુક પર પ્રોફાઇલ સ્ટેટસ અપડેટ કરવાનું.”.....“ધેર યુ આર. સાચો જવાબ.”

* * * * * * *

(Tuesday, 29 May 2012 at 08:40pm)

યાર – દોસ્તો – મિત્રો – બહેનપણીઓ.....એક વાતનો જવાબ આપો કે દેશ-દુનિયામાં મહિલાઓને થતો અન્યાય ક્યાં સુધી ચાલુ રહેશે? એક જણ ‘વાળ કપાવવા’ના ચાલીસ રૂપિયા ચુકવે અને બીજાએ બ્યુટી પાર્લરમાં એ જ કામના ‘હેર કટ’ના નામે ચારસો રૂપિયા ચુકવવાના!

હે ડમડમબાબા આ ક્યાંનો ન્યાય છે?

* * * * * * *

(Wednesday, 30 May 2012 at 08:40pm)

"દેશના કયા શહેરનું નામ નાસ્તા હાઉસવાળા રોજ બોલે છે?"..."દિલ્હી." ના..."ઇન્દોર." ના....."રતલામનું. રતલામી સેવ વેચવા."

* * * * * * *

(Wednesday, 30 May 2012 at 08:50pm)

"નિરમા યુનિવર્સિટીમાં શું નથી ભણાવાતું?"

"વોશિંગ પાઉડર બનાવવાની ફૉર્મ્યૂલા."

આ અગાઉ અહીં મુકેલી મે – 2013ના પ્રોફાઇલ સ્ટેટસની પોસ્ટ લીંક આ રહી – http://www.binitmodi.blogspot.in/2013/06/2013.html

(* નિશાની વાળી તસવીર : બિનીત મોદી, એ સિવાયની સંબંધિત તસવીરો અને ઇમિજસ : નેટ પરથી)