ફેસબુક : ફન, ફંડાઝ અને ફેક્ટ્સ (ઑગસ્ટ – 2015)

(ઑગસ્ટ – 2015)

સોશિયલ નેટવર્કિંગ સાઇટ પર જે કંઈ લખાય તેના અસ્તિત્વનું માપ સેકન્ડ – મિનિટોથી શરૂ કરીને થોડા કલાકો સુધી લંબાવી શકાય. પછી?...પછી એને ભૂલી જવાનું. આદર્શ વસ્તુસ્થિતિ એને ભૂલી જવામાં જ છે. પરંતુ અહીં બ્લોગની દિવાલ પર તેને કોપી-પેસ્ટ કરવા પાછળના બે આશય છે.

એક તે એનું અસ્તિત્વ થોડા મહિના-માસ લંબાવવાનું અને બીજો તે જેઓ સોશિયલ નેટવર્કિંગ જગતમાં દાખલ નથી થયા અથવા દાખલ થયા પછી દૂર થયા છે તેમના સુધી પહોંચવાનો.

આ રીતે દર મહિને Control ‘A’ – Control ‘C’ – Control ‘V’ની મદદથી રજૂ થવાના વિચારને 2012માં અમલમાં મૂક્યા પછી તેને નિયમિત કરતાં એ ક્રમમાં આ 58મી પોસ્ટ છે.

2010ના વર્ષની એક અને 2011, 2012, 2013 અને 2014ના વર્ષની મહિનાવાર સ્ટેટસ પ્રોફાઇલ પોસ્ટ રજૂ કર્યા પછી પ્રસ્તુત છે હવે ઑગસ્ટ – 2015. જે તે દિવસના વાર, તારીખ અને સમયના ઉલ્લેખ નીચે એ દિવસનું ‘સ્ટેટસ અપડેટ’ છે. ‘ફેસબુક’ / FACEBOOK પર આવા દરેક સ્ટેટસ અપડેટ સાથે મારું નામ અને કૌંસમાં ગામનું નામ ‘અમદાવાદ’ / Ahmedabad એમ લખતો હોઉં છું પરંતુ અહીં એમ કરવું જરૂરી નથી લાગતું. હા, ડમડમબાબા એ બ્લોગલેખકના અસ્તિત્વનો જ એક ભાગ છે.

આભાર.

(Monday, 3 August 2015 at 02:22pm)

પનીરના સમચોરસ ટુકડાઓએ ગોળ ગુજરાતી થાળીની આગવી ઓળખ પર તરાપ મારી છે.

* * * * * * *

(Wednesday, 5 August 2015 at 03:15pm)

પોર્નૉગ્રફિક વેબસાઇટ્સ બ્લૉક કરી દેવાઈ હોય કે સહેલાઇથી ખૂલતી ન હોય તો વિકલ્પે...આજે બુધવાર છે...

ગુજરાતી અખબારોની અર્ધ-સાપ્તાહિક પૂર્તિમાં પ્રકટ થતી ‘અસમંજસ’ (ગુજરાત સમાચાર, લેખક : જોબન પંડિત), ‘યૌવનની સમસ્યા’ (સંદેશ, લેખક : સોક્રેટિસ) કે ‘મુગ્ધાવસ્થાની મૂંઝવણ’ જેવી સવાલ-જવાબની કૉલમો વાંચી જ શકાય છે.

* * * * * * *

ભાઈ-બહેનની જોડી : સુષ્મા સ્વરાજ અને લલિત મોદી

(Friday, 7 August 2015 at 12:34pm)

‘રક્ષાબંધન’નું પરબીડિયું સમયસર રવાના કરવા વિદેશપ્રધાન સુષ્મા સ્વરાજને વિનંતી કરવામાં આવે છે જેથી લલિત મોદી કયા દેશમાં છે તે શોધીને તેમને સમયસર પહોંચતું કરી શકાય.

લિ. ટપટપબાબા, પ્રવક્તા – ભારતીય ટપાલ વિભાગ

* * * * * * *

(Wednesday, 12 August 2015 at 01:40pm)

રાધે માના ‘અનુયાયી’ થવા માટે બાપ – દીકરા વચ્ચે જામી હોડ...

(બાપ – દીકરા = આશારામ અને નારાયણ સાઈ)

* * * * * * *

(Wednesday, 19 August 2015 at 01:30pm)

યુવાન વયે વાઇલ્ડ લાઇફ ફોટોગ્રાફીનો શોખ ધરાવનાર પ્રૌઢ વયે પહોંચતા ફંક્શન ફોટોગ્રાફીમાં પણ ઝૂમ લેન્સનો ઉપયોગ કરવાનું ચૂકતા નથી.

(19 ઑગસ્ટ – વિશ્વ ફોટોગ્રાફી દિવસ)

* * * * * * *

(Friday, 21 August 2015 at 06:00pm)

ગર્વ (કે અભિમાનથી) ડોક (કે માથું) એટલું ઊંચું ન રાખો કે હલાલ કરનારને સરળતા રહે અથવા તો ફાવતું જડી જાય. – કન્ફ્યુશિયસ

નોંધ : કન્ફ્યુશિયસએ આવું કંઈ કહ્યું નથી. આ તો તેમના નામે ઠોકાઠોક કરીએ તો ઠીક વજન પડે.

* * * * * * *

GMDC ગ્રાઉન્ડ નહીં, ગુજરાત યુનિવર્સિટી મેદાન

(Monday, 24 August 2015 at 06:00pm)

મહારેલીમાં હાજર રહેનારા પાટીદારો માટે ફૂલવડી – મોહનથાળના ફૂડપૅકેટ તૈયાર થઈ ગયા છે...જો કે સભા સ્થળ GMDC ગ્રાઉન્ડ પર દિવસે ચરવા આવતી ગાય – ભેંસો આવતીકાલે ભૂખી રહેશે એ નક્કી.

નોંધ : જેને GMDC ગ્રાઉન્ડ તરીકે ઓળખાવવામાં આવે છે તે જમીનની અસલ અને એકમાત્ર માલિક ગુજરાત યુનિવર્સિટી છે જ્યાં નજીકમાં આવેલા વાળીનાથ ચોકમાં વસતા ‘દેસાઈ’ભાઈ-બહેનોની પાળેલી ગાયો – ભેંસો ચરવા આવે છે.

* * * * * * *

માત્ર ગુગલ પ્લસ પર...

(Thursday, 27 August 2015 at 06:30pm)

પાટીદારોની ‘આરક્ષણ’ માગવા ભરાયેલી સભા પર પોલીસ ‘દબંગ’ બનીને તૂટી પડી.

* * * * * * *

ઇન્ટરનેટનો ઉપવાસ : એક નોંધ

‘સરદાર પટેલ ગ્રૂપ’ના બૅનર તળે મહેસાણા ખાતે 6 જુલાઈ 2015ના રોજ આયોજિત પ્રેસ કૉન્ફરન્સમાં સમિતિના કન્વીનર હાર્દિક પટેલએ તાલેવંત – પૈસાપાત્ર ગણાતા પાટીદારો માટે અનામતનો લાભ મેળવવાની માગણી મુકી. એ પછી ગુજરાતના નાના-મોટા શહેરોમાં નીકળેલી સો(૧૦૦)થી વધુ રેલીઓમાં પાટીદારોએ OBC કૅટિગરિની 27 ટકા અનામતમાં પોતાના હિસ્સો માગતા આવેદનપત્રો સ્થાનિક અધિકારીઓને આપ્યા.

આટલેથી નહીં સંતોષાયેલા આગેવાનોએ પોતાની માગણી અને બુદ્ધિનું જાહેર પ્રદર્શન કરવા અમદાવાદના GMDC ગ્રાઉન્ડ તરીકે ઓળખાતા ગુજરાત યુનિવર્સિટીના મેદાન પર 25મી ઑગસ્ટ 2015ના રોજ જાહેર સભાનું આયોજન કર્યું. તલાટીથી લઇને મામલતદાર – કલેક્ટરને આવેદનપત્રો આપી ચુકેલા આગેવાનોના આગેવાન હાર્દિક પટેલે અમદાવાદ જિલ્લા કલેક્ટરની ઑફિસ સુધી આઠ કિલોમીટર લાંબી રેલી કાઢી. એ પછી એવી માગણી મુકી કે ગુજરાત રાજ્યના મુખ્યમંત્રી શ્રીમતી આનંદીબહેન પટેલ સભાસ્થળે આવેદનપત્ર લેવા આવે તો જ આપીએ નહીં તો અહીં જ ડેરા-તંબુ તાણીને અચોક્કસ મુદતના ઉપવાસ.

દૈનિક ધોરણે રૂપિયા નવ લાખના ભાડે અપાતા અને સભા-મહારેલી માટે માત્ર એક રૂપિયાની પ્રતિકાત્મક કિંમતે અપાયેલા મેદાનની ચોકી કરતી ગુજરાત પોલીસને લાગ્યું કે મામલો હાથમાંથી સરકી રહ્યો છે. સમી સાંજે પરિસ્થિતિને કાબુમાં લેવા પોલીસ હાર્દિક પટેલને ‘સલામતી’ના કારણોસર સભા સ્થળથી દૂર લઈ ગઈ જેનો હાજર રહેલી મેદનીએ ‘ધરપકડ થઈ’ તેવો અર્થ કર્યો.

બન્ને પક્ષે વ્યાપેલી ગેરસમજ અંતે પોલીસની ‘ડંડાવાળી’માં પરિણમી. જેના પરિણામે ગુજરાતભરમાં ફાટી નીકળેલા તોફાનોએ જાહેર મિલકતોને નુકસાન કરવા સાથે દસ નિર્દોષ નાગરિકોના પ્રાણ પણ હરી લીધા.

એકાદ દાયકાથી એકંદરે કાગળ પર શાંત ગણાતા આવેલા ગુજરાતમાં ફાટી નીકળેલા તોફાનો થકી અફવાઓને જોર ન મળે તે હેતુથી ગુજરાત સરકારે તાત્કાલિક પગલાં લઇને 25 ઑગસ્ટ 2015ની મધરાતથી જ મોબાઇલ ઇન્ટરનેટ સેવાઓ પર પ્રતિબંધ મુકી દીધો હતો. 1 સપ્ટેમ્બર 2015ની મધરાત સુધી ચાલેલા આ પ્રતિબંધ દરમિયાન ‘ફેસબુક’, ‘વોટ્સએપ’ જેવી સોશિઅલ નેટવર્કિંગ સાઇટ્સનો ઉપયોગ પણ પ્રતિબંધિત જ રહ્યો.

ભારતમાં આ પ્રકારનો આ પહેલો જ પ્રતિબંધ હતો એટલે એ અર્થમાં પણ અત્યાર સુધી પાછળ રહેલું ગુજરાત ‘નંબર વન’ રાજ્ય બની ગયું.

ગયા મહિને અહીં મુકેલી જુલાઈ – 2015ના પ્રોફાઇલ સ્ટેટસની પોસ્ટ લિંક આ રહી –

http://www.binitmodi.blogspot.in/2015/08/2015.html

..... તેમજ ગત વર્ષોમાં અહીં મુકેલી ઑગસ્ટ – 2011, ઑગસ્ટ – 2012, ઑગસ્ટ – 2013 તેમજ ઑગસ્ટ – 2014ના પ્રોફાઇલ સ્ટેટસની પોસ્ટ લિંક અનુક્રમે આ રહી –

http://www.binitmodi.blogspot.in/2012/09/2011.html

http://www.binitmodi.blogspot.in/2012/09/2012.html

http://www.binitmodi.blogspot.in/2013/09/2013.html

http://www.binitmodi.blogspot.in/2014/09/2014.html

(સંબંધિત તસવીરો અને ઇમિજસ : નેટ પરથી)

ફેસબુક : ફન, ફંડાઝ અને ફેક્ટ્સ (જુલાઈ – 2015)

(જુલાઈ – 2015)

સોશિયલ નેટવર્કિંગ સાઇટ પર જે કંઈ લખાય તેના અસ્તિત્વનું માપ સેકન્ડ – મિનિટોથી શરૂ કરીને થોડા કલાકો સુધી લંબાવી શકાય. પછી?...પછી એને ભૂલી જવાનું. આદર્શ વસ્તુસ્થિતિ એને ભૂલી જવામાં જ છે. પરંતુ અહીં બ્લોગની દિવાલ પર તેને કોપી-પેસ્ટ કરવા પાછળના બે આશય છે.

એક તે એનું અસ્તિત્વ થોડા મહિના-માસ લંબાવવાનું અને બીજો તે જેઓ સોશિયલ નેટવર્કિંગ જગતમાં દાખલ નથી થયા અથવા દાખલ થયા પછી દૂર થયા છે તેમના સુધી પહોંચવાનો.

આ રીતે દર મહિને Control ‘A’ – Control ‘C’ – Control ‘V’ની મદદથી રજૂ થવાના વિચારને 2012માં અમલમાં મૂક્યા પછી તેને નિયમિત કરતાં એ ક્રમમાં આ 57મી પોસ્ટ છે.

2010ના વર્ષની એક અને 2011, 2012, 2013 અને 2014ના વર્ષની મહિનાવાર સ્ટેટસ પ્રોફાઇલ પોસ્ટ રજૂ કર્યા પછી પ્રસ્તુત છે હવે જુલાઈ – 2015. જે તે દિવસના વાર, તારીખ અને સમયના ઉલ્લેખ નીચે એ દિવસનું ‘સ્ટેટસ અપડેટ’ છે. ‘ફેસબુક’ / FACEBOOK પર આવા દરેક સ્ટેટસ અપડેટ સાથે મારું નામ અને કૌંસમાં ગામનું નામ ‘અમદાવાદ’ / Ahmedabad એમ લખતો હોઉં છું પરંતુ અહીં એમ કરવું જરૂરી નથી લાગતું. હા, ડમડમબાબા એ બ્લોગલેખકના અસ્તિત્વનો જ એક ભાગ છે.

આભાર.

(Friday, 3 July 2015 at 02:00pm)

ટ્રક ડ્રાઇવિંગ કરીને બે પાંદડે થયેલો ડ્રાઇવર કાર ફેરવતો થઈ જાય પછી પણ હૉર્ન તો એ ખટારાનું જ નંખાવે છે અને એ જ સ્ટાઇલથી વગાડે છે.

* * * * * * *

(Thursday, 9 July 2015 at 03:00pm)

શર્ટની સિલાઈ સાથે આપવામાં આવતા વધારાના બટનનો કોઈ ઉપયોગ થાય તે પહેલા જ શર્ટ કધોવન પડી જાય અથવા કલર ફટકી જાય...કાં તો શર્ટ ફાટી જાય છે...

આમ ‘બટન’ જેવી મહામૂલી રાષ્ટ્રીય સંપત્તિનો બગાડ થાય છે.

* * * * * * *

(Friday, 10 July 2015 at 02:45pm)

શેરબજારનો ઇન્ડેક્ષ કહેવાતો સેન્સેક્ષ તો ગબડી જ રહ્યો છે...ફૂડ ઇન્ડેક્ષની પણ એવી જ હાલત છે...

ઘરમાં આજથી રસ – રોટલીની જગ્યાએ ભાખરી-શાક-દાળ-ભાતનું મેન્યૂ શરૂ થયું.

* * * * * * *

(Tuesday, 14 July 2015 at 06:00pm)

ગુજરાતમાં કયા સમયે હોદ્દા પર કયા રાજ્યપાલ હતા તે વિગત ગુગલ, વીકીપીડિઆ, ગુજરાત સરકારની વેબસાઇટના વિકલ્પે ચંદ્રકાન્ત મહેતાના પુસ્તકોની ‘અર્પણ’ નોંધના પાના પરથી પણ મળી શકે છે.

* * * * * * *

જગન્નાથજી, સુભદ્રાજી અને બલભદ્રજી

(Friday, 17 July 2015 at 11:22am)

જગન્નાથજી – સુભદ્રાજી અને બલભદ્રજીએ અમદાવાદ મ્યુનિસિપલ કૉર્પોરેશનની દાણાપીઠ સ્થિત મુખ્ય કચેરીની યાત્રા કરી. ભાવવિભોર બની નગરપતિ મીનાક્ષીબહેન પટેલના દર્શન કર્યા. રથયાત્રાના દિવસે પોતાના રથ ખાડામાં ખૂંપી ન જાય કે તેના વજનથી ભૂવા ના પડે તે માટે ત્રણેય ભાઈ-બહેને સાથે મળીને મેયરને પ્રાર્થના કરી.

* * * * * * *

(Tuesday, 21 July 2015 at 02:55pm)

C = Canteen – સંસદની કૅન્ટીનમાં મળતું સસ્તું ભોજન

C = Chauhan Gajendra – FTIIની ગવર્નિંગ કાઉન્સિલના ચૅરમૅનપદે નિમણૂક

C = Chauhan ShivrajSinh – મધ્યપ્રદેશની સરકારી નોકરીઓનું ‘વ્યાપમ’ કૌભાંડ

C = Chhattisgarh – મુખ્યમંત્રી ડૉ. રમણસિંહનું ચોખા કૌભાંડ

C = Corruption – મહારાષ્ટ્રના બાળકલ્યાણ મંત્રી પંકજા મુંડેનું ચીકી કૌભાંડ

C = Cricket – વિદેશમંત્રી સુષ્મા સ્વરાજ અને રાજસ્થાનના મુખ્યમંત્રી વસુંધરા રાજેની લલિત મોદીને ‘માનવીય મદદ’

C = Crime – ‘વ્યાપમ’ કૌભાંડ સાથે સંકળાયેલાઓના શંકાસ્પદ મોતનો સિલસિલો

સાત ‘C’ના વરસાદ સાથે સંસદના ચોમાસુ સત્રનો આરંભ...

* * * * * * *

(Friday, 24 July 2015 at 01:15pm)

દર શુક્રવારે રજૂઆત પામતી નવી હિન્દી ફિલ્મોના રિવ્યૂ લખતા ગુજરાતી લેખકોએ રિલીઝના ત્રણ અઠવાડિયા પછી પણ હિન્દી ફિલ્મના ગુજરાતી નિર્માતા – દિગ્દર્શક જશવંત ગાંગાણીની ફિલમ ‘બેજુબાન ઇશ્ક’ વિશે અક્ષરેય પાડ્યો નથી. આ ‘બેજુબાન ધોખાબાજી’ છે.

હિન્દી ફિલમ બનાવો તો ય ગુજરાતી તરીકે તો ‘શું શા પૈસા ચાર’ જ રહો છો...2015માં પણ...

* * * * * * *

(Monday, 27 July 2015 at 11:45am)

સનસનીખેજ સમાચાર સંશોધન...

અમદાવાદની જમીનમાં ગ્લૂકોસનું પ્રમાણ વધ્યું...કૂતરાને ખવડાવતા તેણે છોડી દીધેલા બિસ્કિટ વરસાદી પાણી મારફતે જમીનમાં ભળતા ઊભી થયેલી સમસ્યા.

શું સ્થાનિક કંદોઇઓ કે સ્થાનિક સત્તાધીશો પગલાં લેશે?

* * * * * * *

પ્રતિભાશાળી રાષ્ટ્રપતિ ડૉ. એપીજે અબ્દુલ કલામ અને

પ્રતિભાવિહીન રાષ્ટ્રપતિ પ્રતિભા પાટીલ

(Thursday, 30 July 2015 at 11:48am)

એકાધિક પ્રતિભાથી છલોછલ ડૉ. એપીજે અબ્દુલ કલામનો રાષ્ટ્રપતિપદનો કાર્યકાળ પૂર્ણ થયા પછી...‘પ્રતિભા’ વિનાના પ્રતિભા દેવીસિંહ પાટીલને એ પદની સોંપણી તો કરવી જ પડી...પરંતુ...કલામસાહેબના જન્નતનશીન થવાની લગોલગ પાટીલ મૅડમએ તેનું પ્રમાણ પણ આપી દીધું...ગાડી માટે ડ્રાઇવરનો પગાર અને પૅટ્રોલ માંગીને...

અલવિદા ડૉ. અબ્દુલ કલામ...

* * * * * * *

યાકુબ મેમણ

(Friday, 31 July 2015 at 07:40pm)

“યાકુબ, ફાંસીની સજાનો અમલ થાય એ પહેલા તારી આખરી ઇચ્છા શું છે?”

“મૃત્યુની જાહેરાત પછી મારી દફનવિધિ એક મોટા મેદાનની વચ્ચો-વચ્ચ કરવામાં આવે જેથી મારા બચાવમાં કૂદી પડેલા લોકો માટે આસપાસની જગ્યા કામમાં આવે અને હું એમનો હિસાબ કરી શકું. ચાર્ટર્ડ અકાઉન્ટન્ટ છું ને...”

ડમડમબાબા ડાયલૉગ સિરીઝ.....

ગયા મહિને અહીં મુકેલી જૂન – 2015ના પ્રોફાઇલ સ્ટેટસની પોસ્ટ લિંક આ રહી –

http://www.binitmodi.blogspot.in/2015/07/2015.html

..... તેમજ ગત વર્ષોમાં અહીં મુકેલી જુલાઈ – 2011, જુલાઈ – 2012, જુલાઈ – 2013 તેમજ જુલાઈ – 2014ના પ્રોફાઇલ સ્ટેટસની પોસ્ટ લિંક અનુક્રમે આ રહી –

http://www.binitmodi.blogspot.in/2012/08/2011.html

http://www.binitmodi.blogspot.in/2012/08/2012.html

http://www.binitmodi.blogspot.in/2013/08/2013.html

http://www.binitmodi.blogspot.in/2014/08/2014.html

(સંબંધિત તસવીરો અને ઇમિજસ : નેટ પરથી)